Бүгін әлемдік қауымдастық Қазақстанның бастамасымен БҰҰ Бас Ассамблеясы бекіткен Ядролық сынақтарға қарсы іс-қимылдың халықаралық күнін атап өтуде. Осыған орай Мемлекет басшысы Қасым-Жомарт Тоқаев Қазақстан халқына үндеу жасады, деп хабарлайды Adym.kz ақпараттық сайты Ақордаға сілтеме жасап.
Президент өз үндеуінде Семей ядролық полигонының жабылуы Қазақстанның тарихындағы аса маңызды шешім болғанын атап өтті. Осыдан 35 жыл бұрын, 1991 жылғы 29 тамызда Семей ядролық полигоны жабылып, ондаған жыл бойы жүргізілген ядролық сынақтарға нүкте қойылды.
Мемлекет басшысының айтуынша, полигонда жасалған жарылыстар халықтың денсаулығы мен қоршаған ортаға орасан зор зиян келтіріп, орны толмас қасірет әкелді. Сондықтан бұл күн ядролық сынақтардың ауыр зардабын еске салып қана қоймай, адамзатты мұндай алапат апатқа жол бермеуге үндейтін маңызды дата болып саналады.
Қасым-Жомарт Тоқаев Қазақстанның ядролық қарудан өз еркімен бас тартқанын атап өтті. Ел бейбітшілік, қауіпсіздік және тұрақты даму жолын таңдап, тарихи шешім қабылдады. Президент бұл қадам Қазақстанның болашақ ұрпақ алдындағы жауапкершілігін айқын көрсететінін жеткізді.
Мемлекет басшысы Қазақстанның антиядролық ұстанымы өзгермейтінін атап өтті. Еліміз ядролық державалар арасындағы текетірестің орнына келіссөздер жүргізуді қолдайды.
– Біз ядролық державалар арасында кикілжің емес, келіссөздер болуын қолдаймыз, Ядролық сынақтарға жан-жақты тыйым салу туралы шарттың күшіне енуін тездетуге және ядролық қаруды қолдануға қатысты қауіп-қатерлерді жою үшін бірлесіп батыл қадамдар жасауға шақырамыз, – деді Президент.
Сонымен қатар Мемлекет басшысы атом энергиясын тек бейбіт әрі жасампаз мақсатта пайдалану қажеттігін атап өтті. Оның айтуынша, Қазақстан халқы жалпыұлттық референдумда ядролық энергетиканы дамытудың стратегиялық бағытын қолдап, елдің ұзақ мерзімді экономикалық және ғылыми-техникалық дамуына жол ашты.
Президент бұл стратегиялық таңдау Қазақстанның тұрақты өсіп-өркендеуіне жаңа серпін беретінін атап өтті. Оның айтуынша, бүгінде жүзеге асырылып жатқан ауқымды реформалардың түпкі мақсаты – Әділетті, Озық және Таза Қазақстан құру.
– Бәріміз бір ел болып, биік мақсатымызға жетеміз. Мен бұған кәміл сенемін, – деп түйіндеді Қасым-Жомарт Тоқаев үндеуін.
