ADYM.KZ / Астанада жаңа әуежайдың құрылысы келесі жылы басталады. Бұл туралы Үкімет отырысында Көлік министрі Нұрлан Сауранбаев мәлімдеді.
Министрдің айтуынша, елордадағы әуежай инфрақұрылымын жаңғырту – министрліктің басым бағыттарының бірі. Қазіргі уақытта Астана қаласының әкімдігі құрылысқа қажетті дайындық жұмыстарын жүргізіп жатыр.
«Қала әкімдігі тарапынан барлық қажетті дайындық жұмыстары атқарылуда. Жаңа әуежайдың құрылысы келесі жылы басталады», – деді Нұрлан Сауранбаев.
Сондай-ақ министр алдағы үш жылда Қазақстанның әуежай инфрақұрылымын ауқымды жаңғырту жоспарланып отырғанын айтты.
Оның сөзінше, қазіргі таңда әуе хабтарын дамыту жұмыстары еліміздің алты ірі әуежайына бағытталған. Олар – Алматы, Астана, Ақтау, Ақтөбе, Қарағанды және Шымкент қалаларындағы әуежайлар.
«Бұл бағытта қажетті институционалдық және инфрақұрылымдық жағдайлар кезең-кезеңімен жасалып жатыр», – деп толықтырды министр.
