Шымкент қаласында қоғамдық орындарды, аялдамаларды, саябақтар мен спорт алаңдарын бүлдіру, яғни вандализм фактілерінің алдын алу бойынша қатаң шаралар қабылдануда. Өкінішке қарай, бұзақылық әрекеттерге көбінесе жастар мен жасөспірімдердің бой алдыратыны байқалады.
Қалалық полиция департаментінің мәліметінше, қоғамдық орындардағы «Сергек» және басқа да бейнебақылау камераларының көмегімен мүлікке зиян келтірген құқық бұзушылар жедел түрде анықталып, заң аясында қатаң жауапқа тартылуда. Соңғы уақытта осындай теріс әрекеттердің алдын алу мақсатында қала мектептері мен колледждерінде «Мүлікке ұқыпты қара – қалаңды сүй» атты танымдық кездесулер өткізілді.
Қалалық қоғамдық кеңестің мүшесі Серікжан Бейсенбаев вандализм мәселесіне қатысты өз пікірін білдірді:
«Қаламыздың тазалығы мен әдемілігі әрқайсымызға байланысты. Жас буын қоғамдық мүлікті бүлдіру – жай ғана бұзақылық емес, нақты қылмыс екенін, оған заң жүзінде ірі көлемде айыппұл немесе бас бостандығынан айыру түріндегі жазалар қарастырылғанын нақты түсінуі тиіс. Өкінішке қарай, жастардың кейбірі мұны ермек көреді. Мұның алдын алу үшін отбасында да, оқу орнында да рухани-адамгершілік тәрбиені күшейту қажет».
Түсіндіру жұмыстары барысында жастарға қала мүлігін қорғаудың маңыздылығы түсіндіріліп, ортақ мүлікке деген жауапкершілік сезімі насихатталды.
