ADYM.KZ / Шымкент қаласында қоғамдық орындарды, аялдамаларды, саябақтар мен спорт алаңдарын бүлдіру, яғни вандализм фактілерінің алдын алу бағытында кешенді шаралар қолға алынуда. Қаланың инфрақұрылымын сақтау, тұрғындарға қолайлы орта қалыптастыру және жастардың қоғамдық мүлікке деген жауапкершілігін арттыру – профилактикалық жұмыстардың негізгі мақсаты.
Өкінішке қарай, қоғамдық орындардағы мүлікті бүлдіру әрекеттеріне көбіне жастар мен жасөспірімдердің бой алдыратыны байқалады. Мұндай құқық бұзушылықтар қаланың көркін кетіріп қана қоймай, ортақ мүлікті қалпына келтіруге қосымша қаражат жұмсауды қажет етеді. Сондықтан вандализмге қарсы күрес құқықтық шаралармен қатар, жүйелі тәрбие және түсіндіру жұмыстарын жүргізуді де талап етеді.
Қалалық полиция департаментінің мәліметінше, қоғамдық орындарда орнатылған «Сергек» және өзге де бейнебақылау камераларының көмегімен мүлікке зиян келтірген азаматтар анықталып, заңнамаға сәйкес жауапкершілікке тартылуда. Бейнебақылау жүйелері құқық бұзушылықтарды тіркеуге, оқиғаның мән-жайын анықтауға және кінәлі тұлғаларды белгілеуге мүмкіндік береді.
Вандализмнің алдын алу мақсатында қала мектептері мен колледждерінде «Мүлікке ұқыпты қара – қалаңды сүй» тақырыбында танымдық кездесулер өткізілді. Іс-шаралар барысында білім алушыларға қоғамдық орындардың тазалығы мен тәртібін сақтау, ортақ мүлікке ұқыпты қарау және заң талаптарын орындау қажеттігі түсіндірілді.
Қалалық қоғамдық кеңестің мүшесі Серікжан Бейсенбаев вандализмнің қоғамға келтіретін зиянына тоқталып, жас ұрпақтың тәрбиесіне ерекше мән беру қажеттігін атап өтті.
«Қаламыздың тазалығы мен әдемілігі әрқайсымызға байланысты. Жас буын қоғамдық мүлікті бүлдірудің жай ғана бұзақылық емес, заң алдында жауапкершілікке әкеп соғатын әрекет екенін түсінуі тиіс. Мұндай жағдайлардың алдын алу үшін отбасында да, оқу орындарында да рухани-адамгершілік тәрбиені күшейту қажет», – деді ол.
Түсіндіру жұмыстары аясында жастарға қоғамдық мүлікті қорғаудың маңызы айтылып, ортақ игілікке жауапкершілікпен қарау мәдениеті насихатталды.
Қоғамдық кеңістіктерді сақтау – баршаға ортақ міндет. Осы бағыттағы профилактикалық жұмыстар алдағы уақытта да жалғасып, қала тұрғындарының құқықтық мәдениетін арттыруға және вандализмнің алдын алуға басымдық берілмек.
