ADYM.KZ / Қазақстан құрамасының шабуылшысы Дастан Сәтпаев ағылшындық «Бернли» клубындағы алғашқы күндері, жаңа командаға бейімделу процесі және ұжым ішіндегі атмосфера туралы пікір білдірді.
Жас футболшының айтуынша, жаңа командадағы әріптестері оны жылы қабылдап, Англиядағы жаңа ортаға тезірек бейімделуіне қолдау көрсетіп жатыр.
«Жалпы командада жақсы қабылдады, бәрі мейірімді. Не керек, не керек емес екенін сұрайды, үнемі қолдау көрсетеді. Тіпті бәрімізге таныс Кайлдың өзі де қолдау көрсетіп, жақын тартып сөйлеседі», – деді Дастан Сәтпаев.
Футболшы қазіргі уақытта командадағы барлық дерлік әріптесімен араласып жүргенін айтты. Оның сөзінше, әзірге ерекше жақын араласып кеткен бір ғана командаласын бөліп көрсету қиын.
«Негізгі уақытта жеңісті шешуіміз керек еді»
Дастан Сәтпаев «Бернлидің» соңғы матчына да тоқталды. Оның пікірінше, команда кездесудегі көптеген мүмкіндікті пайдалана алмай, матч тағдырын негізгі уақытта шешіп қою мүмкіндігін жіберіп алған.
«Менің ойымша, бәрін негізгі уақытта шешуіміз керек еді. Сәттер өте көп болды, тек өзіміз жүзеге асыра алмадық. Ал пенальти – бұл лотерея. Сондықтан әрі қарай дайындаламыз. Ойлауымша, тек бірінші ойында жеңіске жету керек, содан кейін бәрі өз арнасына түседі», – деді қазақстандық шабуылшы.
Ол матчтан кейінгі бас бапкердің реакциясы туралы да айтып өтті. Сәтпаевтың сөзінше, команда басшысы «Бернлидің» төменгі лига өкіліне қарсы кездесуде жеңіске жетуі тиіс болғанын атап көрсеткен.
Ағылшын футболының жоғары қарқыны ұнайды
Қазақстандық футболшы Англиядағы ойын кестесінің тығыздығы мен футболдың жоғары қарқынына да оң бағасын берді.
«Кесте өте жақсы, дұрыстап ойнап шығасың. Бірақ қазір турнирден ұшып кеткендіктен, ойындар азырақ болатын сияқты. Сондықтан жалпы алғанда бәрі қалыпты. Қарқын өте жоғары, жақсы», – деді Сәтпаев.
Осылайша, Дастан Сәтпаев ағылшын футболына бейімделу кезеңін жалғастырып жатыр. Жас шабуылшы үшін «Бернли» сапындағы әрбір матч пен жаттығу жоғары деңгейдегі футболда тәжірибе жинап, кәсіби шеберлігін шыңдауға мүмкіндік бермек.
Айта кетейік, Дастан Сәтпаев «Бернли» клубында маусым соңына дейін жалға алу келісімі негізінде өнер көрсетіп жүр. Бұған дейін қазақстандық футболшының ағылшын чемпионатында «Бернли» сапындағы алғашқы матчын өткізгені хабарланған болатын.
