ADYM.KZ / Шымкентте білім беру ресурстарын тиімді пайдалану, қаржылық тәртіпті жетілдіру және цифрлық бақылау тетіктерін дамыту мәселелері талқыланды. 15 қазанда басталған өңіраралық тәжірибелік семинар-кеңес қосымша білім беруге арналған бірыңғай мемлекеттік тапсырысты іске асыру тәжірибесін таратуға арналды. Жиын Қазақстан Республикасы Оқу-ағарту министрлігінің бастамасымен ұйымдастырылды.
Семинарға орталық мемлекеттік органдардың, «Қазақтелеком» АҚ мен «Қаржы орталығы» АҚ-ның өкілдері, еліміздің 11 өңірінен әкім орынбасарлары, сондай-ақ білім беру, экономика, цифрландыру, спорт және мәдениет салаларының басшылары мен мамандары қатысты. Қатысушылар бюджет қаражатын ұтымды пайдалану, білім беру қызметтерінің қолжетімділігін арттыру және мемлекеттік тапсырыстың орындалуын бақылау мәселелерін қарастырды.
Шымкент қаласы әкімінің орынбасары Сәрсен Құранбек білім беру жүйесін дамытуда қолда бар ресурстарды тиімді басқарудың маңызын атап өтті. Оның айтуынша, қаржыландыру көлемімен қатар, қаражаттың мақсатты жұмсалуы мен басқарушылық шешімдердің нәтижелілігіне де басымдық берілуі керек.
– Білім беру жүйесін дамытуда ең алдымен қолда бар мүмкіндіктерді дұрыс бағалап, ресурстарды нақты қажеттілікке қарай бағыттау маңызды. Бұл ретте қаржылық тәртіпті күшейтіп қана қоймай, жоспарлау мен бақылау жұмыстарын жетілдіру қажет. Әрбір басқарушылық шешім нақты нәтижеге негізделіп, балалардың сапалы әрі қолжетімді білім алуына ықпал етуі тиіс, – деді Сәрсен Абайұлы.
Семинарда білім беру ұйымдарының қажеттіліктерін жүйелі бағалау, қаржыландыруды тиімді жоспарлау және бөлінген қаражаттың нәтижесін бақылау мәселелеріне де назар аударылды. Қолданыстағы инфрақұрылымның мүмкіндіктерін толық пайдалану, ресурстарды нақты қажеттілікке сәйкес бөлу және белгіленген көрсеткіштердің орындалуын бағалау білім беру қызметтерінің сапасын арттырудың маңызды тетіктері ретінде қарастырылды.
Цифрлық бақылау құралдарын енгізу мәселесі де талқыланды. Шымкент қаласында қосымша білім беруге арналған бірыңғай мемлекеттік тапсырыстың пилоттық жобасы аясында балалар туралы қайталанатын жазбаларды жою, қызметтің көрсетілгенін растау және қаржыландыруды нақты қызмет алушымен байланыстыру тетіктері енгізілген. Бұл тәсіл мемлекеттік қаражаттың мақсатты жұмсалуын бақылауға мүмкіндік береді.
Сонымен қатар мемлекеттік мектептердің бос қуаттарын пайдалану арқылы балаларды қосымша біліммен қамтуды кеңейту жолдары қарастырылды. Семинар қорытындысы бойынша қатысушылар өңірлер арасындағы тәжірибе алмасудың және білім беру ресурстарын басқарудың тиімді тетіктерін жетілдірудің маңызын атап өтті.
