ADYM.KZ / Астанада Цифрлық кодекс ережелерін жүзеге асыруға арналған конференция өтті. Жиынға сарапшылар, мемлекеттік орган өкілдері және цифрлық сала мамандары қатысып, деректер экономикасын дамыту бағытындағы өзекті мәселелерді талқылады.
Astana Data Exchange алаңында Цифрлық кодекстің негізгі талаптары, оны іске асыру барысы және цифрлық деректерді тиімді пайдалану тетіктері қарастырылды. Қатысушылар деректерді басқару, ақпарат қауіпсіздігі және цифрлық өнімдерді дамыту бойынша ұсыныстарын ортаға салды.
Конференция барысында Цифрлық кодекс талаптарына сәйкес жұмыс істейтін үш негізгі платформа таныстырылды. Аталған платформалар операциялардың ашықтығын қамтамасыз етуге, ақпаратты қорғауға, цифрлық деректер өнімдерін пайдалану үдерістерін бақылауға және заңнама талаптарының орындалуын қамтамасыз етуге бағытталған.
Жиында дербес деректерді қорғау мәселесіне ерекше назар аударылды. Сарапшылар цифрлық ортада азаматтардың ақпараттық қауіпсіздігін сақтау, деректерді жауапкершілікпен пайдалану және сенімді цифрлық инфрақұрылым қалыптастырудың маңызын атап өтті.
Қатысушылардың пікірінше, Цифрлық кодексті тиімді іске асыру Қазақстандағы деректер экономикасының дамуына жаңа мүмкіндіктер ашып, цифрлық қызметтердің сапасын арттыруға ықпал етеді
