ADYM.KZ / Мемлекет басшысы Қасым-Жомарт Тоқаев Өзбекстан Президенті Шавкат Мирзиёевпен телефон арқылы сөйлесіп, оны туған күнімен құттықтады.
Ақорданың мәліметінше, Президент Шавкат Мирзиёевке зор денсаулық, жауапты мемлекеттік қызметіне табыс тілеп, бауырлас өзбек халқының игілігі жолындағы еңбегіне сәттілік тіледі.
Әңгіме барысында Қасым-Жомарт Тоқаев Шавкат Мирзиёевтің басшылығымен Өзбекстанның әлеуметтік-экономикалық даму және халықаралық беделін нығайту бағытында елеулі жетістіктерге қол жеткізіп, кешенді реформаларды табысты жүзеге асырып келе жатқанын атап өтті.
Сонымен қатар Мемлекет басшысы Өзбекстан Президентінің Қазақстан мен Өзбекстан арасындағы достыққа, тату көршілікке негізделген стратегиялық серіктестік пен одақтастық қатынастарды дамытуға қосқан үлесін жоғары бағалады.
Тараптар телефон арқылы әңгіме барысында қазақ-өзбек ынтымақтастығының қазіргі қарқынына оң баға беріп, сауда-экономикалық, көлік-логистикалық және мәдени-гуманитарлық салалардағы өзара байланысты одан әрі дамыту перспективаларын талқылады.
Сондай-ақ президенттер өңірлік және халықаралық күн тәртібіндегі өзекті мәселелер жөнінде пікір алмасып, алдағы жоғары деңгейдегі кездесулердің кестесін қарастырды.
