Тыңдау барысында Әл-Фараби даңғылынан оңтүстікке қарай орналасқан тау бөктерлерінде күрделі құрылыс жүргізуге толық тыйым салу мәселесі көтерілді. Сонымен қатар Іле Алатауы ұлттық табиғи саябағының қорғау режимін сақтау және қаладағы атмосфералық ауа сапасын бақылау жүйесін кеңейту жоспарлары таныстырылды. Жобаға сәйкес, Алматыдағы ауа сапасын бақылайтын тұрақты бақылау бекеттерінің саны 50-ден асады.
Қала әкімдігінің мәліметінше, стратегиялық экологиялық бағалау Бас жоспарды әзірлеу барысында қоршаған ортаға әсер ететін факторларды алдын ала ескеруге мүмкіндік береді.
«Стратегиялық экологиялық бағалау қаланың даму жоспарын әзірлеу кезеңінің өзінде-ақ экологиялық факторларды ескеруге мүмкіндік береді және Алматының жаңа Бас жоспарын дайындаудағы маңызды құрамдас бөлік саналады», – деп хабарлады әкімдік.
Қоғамдық тыңдау барысында тұрғындар қаланы көгалдандыру, жасыл аймақтардың қысқаруы, ауызсу қорының жеткіліктілігі және тұрғын үй кешендерінің көбеюіне байланысты экологиялық тәуекелдер жөнінде өз алаңдаушылықтарын жеткізді.
Көтерілген сұрақтарға қала әкімдігі мен салалық басқармалардың өкілдері, сондай-ақ экология және қала құрылысы саласының мамандары мен сарапшылары жауап беріп, Бас жоспар аясында қоршаған ортаны қорғау мен тұрақты дамуға басымдық берілетінін атап өтті.
Қоғамдық тыңдаулар алдағы уақытта да жалғасып, тұрғындардың ұсыныстары мен ескертулері Алматының жаңа Бас жоспарын жетілдіру барысында ескерілмек.
