ADYM.KZ / Сенат «Қазақстан Республикасы Үкіметі мен Өзбекстан Республикасы Үкіметі арасындағы Қазақстан–Өзбекстан мемлекеттік шекарасы арқылы өткізу пункттері туралы келісімге 2006 жылғы 4 қыркүйектегі хаттамаға өзгерістер мен толықтыру енгізу туралы хаттаманы ратификациялау туралы» заңды мақұлдады.
Сенат депутаты Алишер Сатвалдиевтің айтуынша, хаттамаға 2024 жылғы 8 тамызда Астанада қол қойылған. Құжатқа сәйкес, «Сырдария – Мәлік» және «Целинный – Оқ олтин» автомобиль өткізу пункттерінің мәртебесі екіжақтыдан халықаралық (көпжақты) деңгейге өзгертіледі.
Сонымен қатар, аталған өткізу бекеттерінің жұмыс тәртібі «жарық уақыттан» тәулік бойғы режимге ауыстырылады.
Хаттамада өткізу пункттерінің қызмет аясын кеңейту де көзделген. Атап айтқанда, «Целинный – Оқ олтин» бекеті жеңіл автокөліктермен қатар, бос жүк көліктерін, сондай-ақ ірі көлемді және ауыр салмақты жүктер мен тауарларды тасымалдайтын көлік құралдарын өткізуге мүмкіндік береді.
Ал «Сырдария – Мәлік» өткізу пункті арқылы тек жеңіл автокөліктер мен бос жүк көліктері өтеді. Бұл бекетте жүктер мен тауарларды коммерциялық мақсатта өткізу қарастырылмаған.
Депутаттың айтуынша, енгізіліп отырған өзгерістер өткізу қабілетін арттырып, жолаушылар үшін қолайлы жағдай жасауға, туризмді дамытуға және екі ел арасындағы көлік-транзиттік байланысты нығайтуға ықпал етеді.
Сондай-ақ Сенаттың тұрақты комитеттерінен заң жобасына қатысты ешқандай ұсыныс пен ескерту түспегені айтылды.
