ADYM.KZ / Президент Қасым-Жомарт Тоқаевтың Қытайға жұмыс сапары мен Дүниежүзілік жасанды интеллект (ЖИ) конференциясына қатысуы Қытайдың жетекші бұқаралық ақпарат құралдарында кеңінен жарияланды.
Қытайдың орталық және халықаралық деңгейдегі ірі медиалары Мемлекет басшысының сапарын Қазақстан мен Қытай арасындағы жан-жақты стратегиялық әріптестіктің жоғары деңгейінің айқын көрінісі ретінде бағалап, оның жасанды интеллект саласындағы халықаралық ынтымақтастыққа қатысты бастамаларына ерекше назар аударды.
Қытай Коммунистік партиясы Орталық комитетінің ресми басылымы – «Жэньминь жибао» Президент Қасым-Жомарт Тоқаевтың ҚХР Төрағасы Си Цзиньпинмен өткізген келіссөздері туралы материал жариялады. Басылым екі ел басшыларының қазақ-қытай қатынастарының даму перспективаларын талқылағанын атап өтіп, Қазақстан мен Қытай арасындағы мәңгілік жан-жақты стратегиялық әріптестіктің жаңа кезеңге аяқ басқанын жазды.
Қытайдың мемлекеттік «Синьхуа» ақпарат агенттігі Президенттің сапарына арналған бірнеше мақала жариялап, ресми кездесулерді және Дүниежүзілік жасанды интеллект конференциясындағы сөзін жан-жақты қамтыды. Агенттік Қазақстанның жасанды интеллект технологияларын мемлекеттік басқару, өнеркәсіп, көлік және білім беру салаларына енгізу жөніндегі ұстанымына, сондай-ақ халықаралық ынтымақтастықты күшейту бастамасына назар аударды.
Ал Қытайдың мемлекеттік CCTV телерадио корпорациясы конференцияның ашылу салтанатында сөйлеген Президенттің сөзінен арнайы бейнематериалдар ұсынып, көрермендерге оның қазақ және қытай тілдеріндегі үзінділерін көрсетті.
Ірі халықаралық медиалардың бірі – China News Service әлеуметтік желідегі ресми парақшаларында Қасым-Жомарт Тоқаевтың Қытай Халық Республикасының Төрағасы Си Цзиньпинге қытай тілінде алғыс білдірген сәтінен бейне жариялады. Сондай-ақ агенттік Мемлекет басшысының конференциядағы сөзінің қытай тіліндегі кіріспесін жеке бейнеролик ретінде ұсынып, форумның жаһандық жасанды интеллект саласындағы диалогты дамытудағы рөліне тоқталды.
Phoenix TV телеарнасы Қазақстан Президентінің жасанды интеллект саласындағы халықаралық ынтымақтастық пен жаһандық басқару мәселелеріне қатысты көзқарасын кеңінен талдап, Қазақстанның цифрлық трансформация бағытындағы бастамаларын атап өтті.
Ал Гонконгтағы жетекші қытай тілді басылымдардың бірі – Wen Wei Po Президенттің конференциядағы баяндамасын жариялап, Қазақстанның жасанды интеллектті дамыту стратегиясы мен цифрлық экономиканы ілгерілету жоспарларына ерекше назар аударды.
Жалпы, Қытайдың жетекші ақпарат құралдары Қазақстанның жасанды интеллект саласындағы халықаралық ынтымақтастықты дамытуға бағытталған бастамаларын, цифрлық трансформация саясатын және екі ел арасындағы жоғары деңгейдегі саяси диалогтың қарқынды дамуын кеңінен жариялады. Бұл Президент Қасым-Жомарт Тоқаевтың Қытайға сапары халықаралық медиа кеңістіктің де ерекше назарын аударғанын көрсетті.
