ADYM.KZ / Президент Қасым-Жомарт Тоқаев Дүниежүзілік жасанды интеллект жөніндегі конференцияда сөйлеген сөзінде жасанды интеллект (ЖИ) саласындағы халықаралық ынтымақтастықты күшейту қажеттігін айтып, ЖИ этикасы мен стандарттарын әзірлейтін тұрақты сарапшылық платформаны құруды ұсынды.
Ақорданың баспасөз қызметінің мәліметінше, Мемлекет басшысы қазіргі таңда жасанды интеллект технологиялары қоғамның оны түсіну, бағалау және тиімді реттеу мүмкіндігінен әлдеқайда жылдам дамып жатқанын атап өтті.
Президенттің айтуынша, жасанды интеллектіні дамыту әскери бәсекелестік пен геосаяси текетіреске емес, бейбітшілік, қауіпсіздік және тұрақты даму қағидаттарына негізделуі тиіс.
«Мен Біріккен Ұлттар Ұйымына мүше мемлекеттер мен барлық мүдделі тараптарды жасанды интеллект стандарттары мен этикасын қалыптастыратын тұрақты халықаралық сарапшылық платформаны құруға шақырамын. Жасанды интеллектінің болашағын технология емес, адамдар айқындайды. Сондықтан бұл саланы терең меңгерген мамандарға сұраныс арта береді», – деді Қасым-Жомарт Тоқаев.
Президент жастардың цифрлық дағдыларды меңгеруімен қатар, сыни ойлау қабілетін, зерттеушілік мәдениетін және жоғары этикалық жауапкершілігін дамыту маңызды екенін айтты.
Осыған байланысты Қазақстан Дүниежүзілік жасанды интеллект саласындағы ынтымақтастық ұйымы аясында халықаралық мектептер желісін, озық тәжірибе орталықтарын және академиялық серіктестікті қалыптастыруды ұсынды.
Сөз соңында Мемлекет басшысы Қазақстанның жасанды интеллектінің әлеуетін бейбітшілік, орнықты даму және жалпы өркендеу жолында пайдалануға мүдделі барлық елдермен және халықаралық серіктестермен өзара тиімді ынтымақтастық орнатуға дайын екенін мәлімдеді.
