ADYM.KZ / Қазақстан Президенті Қасым-Жомарт Тоқаев Қатар Әмірі шейх Тәмим бен Хамад Әл Тәниге және оның әулетіне Әмір-Әке шейх Хамад бен Халифа Әл Тәнидің дүниеден өтуіне байланысты көңіл айту үшін Дохаға барды. Бұл туралы Ақорданың баспасөз қызметі хабарлады.
Кездесу барысында Мемлекет басшысы шейх Хамад бен Халифа Әл Тәнидің Қатардың қуатты әрі өркендеген мемлекет ретінде қалыптасуына зор үлес қосқанын атап өтті.
– Ол көрнекті мемлекет қайраткері әрі қазақ халқының жақын досы болды, – деді Президент.
Қасым-Жомарт Тоқаевтың айтуынша, шейх Хамад Қазақстан мен Қатар арасындағы достық қарым-қатынастың нығаюына және стратегиялық серіктестіктің қалыптасуына елеулі еңбек сіңірді. Ол Қазақстанға екі мәрте ресми сапармен келген. Президент 1999 жылғы алғашқы сапары кезінде сол кездегі Сыртқы істер министрі ретінде мәртебелі мейманды қарсы алғанын еске алды.
Мемлекет басшысы сондай-ақ шейх Хамадтың қолдауымен Астанада алғашқы ірі әл-Фараби мешітінің салынғанын және тәуелсіздіктің алғашқы жылдарында Қазақстанда бірқатар әлеуметтік әрі инфрақұрылымдық жобалардың жүзеге асқанын ризашылықпен атап өтті.
– Осындай қаралы сәтте Алла Тағаладан марқұмның жанын жәннаттан етуін тілеп, дұға етеміз, – деді Қасым-Жомарт Тоқаев.
Өз кезегінде Қатар Әмірі шейх Тәмим бен Хамад Әл Тәни Қазақстан Президентіне арнайы келіп көңіл айтқаны үшін алғыс білдірді. Оның айтуынша, бұл екі ел халықтары арасындағы бауырластық пен өзара құрметтің айқын көрінісі.
Қатар тарапының бастамасымен мемлекет басшылары халықаралық күн тәртібіндегі өзекті мәселелерді, соның ішінде Таяу Шығыстағы ахуалды талқылады.
Кездесу соңында Қасым-Жомарт Тоқаев Қатар Әмірін өзіне қолайлы уақытта Қазақстанға ресми сапармен келуге шақырды. Шейх Тәмим бен Хамад Әл Тәни бұл шақыруды ризашылықпен қабыл алды.
Еске сала кетейік, Қатардың бұрынғы Әмірі, ресми түрде «Әмір-Әке» атағын иеленген шейх Хамад бен Халифа Әл Тәни 74 жасында дүниеден өтті. Осыған байланысты Қатарда төрт күндік ұлттық аза тұту жарияланды.
