ADYM.KZ / Мемлекет басшысы Қасым-Жомарт Тоқаев Моңғолия Президенті Ухнаагийн Хурэлсухқа Наадам ұлттық мерекесіне орай құттықтау жеделхатын жолдады. Бұл туралы Ақорданың баспасөз қызметі хабарлады.
Құттықтау хатында Президент Моңғолияның Ухнаагийн Хурэлсухтың басшылығымен қарқынды дамып келе жатқанын атап өтіп, Қазақстан мен Моңғолия арасындағы достық қатынастар мен көпқырлы ынтымақтастық алдағы уақытта да нығая түсетініне сенім білдірді.
Сондай-ақ Қасым-Жомарт Тоқаев Моңғолия Президентіне жауапты мемлекеттік қызметінде табыс, ал бауырлас моңғол халқына бақ-береке мен өсіп-өркендеу тіледі.
Еске сала кетейік, биыл Моңғолияда Наадам мерекесі 10–17 шілде аралығында атап өтіледі. Ел үкіметі бұл шешімді 4 маусымда қабылдаған. Осыған сәйкес, мерекеге байланысты демалыс сегіз күнге жалғасады.
Билік өкілдерінің мәліметінше, мұндай шешім азаматтардың ұсыныстары негізінде қабылданып, мерекені кең көлемде атап өтуге, ішкі туризмді дамытуға және жұмыс пен жеке өмір арасындағы тепе-теңдікті сақтауға бағытталған.
Наадам – Моңғолияның ең ірі әрі маңызды ұлттық мерекелерінің бірі. Оның атауы «ойын-сауық» немесе «ойындар» деген мағынаны білдіреді. Дәстүрлі түрде бұл мереке моңғол халқының тәуелсіздігі мен бірлігінің символы саналады.
