ADYM.KZ / АСТАНА – Астанада өткен «Ауыл» партиясының кезектен тыс XXVI съезінде Құрылтай депутаттарын сайлауға қатысатын кандидаттардың партиялық тізімі мен сайлауалды бағдарламасы бекітілді.
Партиялық тізімге барлығы 69 кандидат енді. Олардың 71 пайызы – ерлер, 29 пайызы – әйелдер. Үміткерлердің орташа жасы – 46.
«Ауыл» партиясы төрағасының бірінші орынбасары Серік Егізбаевтың айтуынша, сайлауалды бағдарлама төрт негізгі бөлімнен тұрады. Құжатта Мәжілістегі партия фракциясының атқарған жұмысының қорытындылары мен өңірлерді дамытудың жеті басым бағыты қамтылған.
Бағдарламада азық-түлік қауіпсіздігін қамтамасыз ету, инфрақұрылымды дамыту, әлеуметтік саясат, білім мен ғылым, экология және дәстүрлі отбасылық құндылықтарды сақтау мәселелеріне басымдық берілген.
«Елдің әл-ауқаты жоғарыдағы кабинеттерден емес, өңірлерден басталады. Сондықтан біздің басты сайлауалды ұстанымымыз – «Қуатты өңір – қуатты орталық!»», – деді Серік Егізбаев.
Съезд барысында партияның жаңа Саяси кеңесінің құрамы да бекітілді. Кеңес құрамына 29 адам енді.
Кезектен тыс съезге еліміздің барлық 20 өңірінен 200 делегат қатысты. Олардың қатарында барлық деңгейдегі мәслихат депутаттары, өңірлік филиалдардың делегаттары, Саяси кеңес мүшелері, партия ардагерлері, жастар өкілдері және шақырылған қонақтар болды.
Еске салайық, бұған дейін «Ақ жол» партиясы Құрылтай сайлауына 63 кандидаттан тұратын партиялық тізімін бекіткен болатын.
