ADYM.KZ / Астанада концерттік және мәдени іс-шараларға қызығушылық артып келеді. Жыл басынан бері өткен бірнеше концерттің билеттері толық сатылып, көрермен саны рекордтық көрсеткішке жеткен.
Бұл туралы қалалық коммуникациялар қызметінде өткен брифингте «Astana Concert» ЖШС-нің концерттік директоры Александр Бихерт мәлімдеді.
Оның айтуынша, биыл өткен бірқатар концерт аншлагпен өтті. Мәселен, әнші МакSимнің концертіне шамамен 5 мың көрермен жиналса, Анна Астидің «Барыс Аренадағы» концертін 9 мыңға жуық адам тамашалаған. Бұл – биыл елордада ең көп көрермен жиналған музыкалық кештердің бірі.
Спикер мәдени жобаларға да сұраныс жоғары екенін атап өтті. Оның сөзінше, «Леонардо да Винчи. Қайта өрлеу дәуірінің данышпаны» көрмесін бүгінге дейін 40 мыңнан астам адам тамашалаған. Экспозицияда Рим мен Флоренция музейлерінен әкелінген 44 түпнұсқа жәдігер қойылған.
Александр Бихерттің айтуынша, жыл соңына дейін Астанада тағы бірнеше ірі концерт өтеді.
17 қыркүйекте Конгресс орталығында Мари Краймбрери өнер көрсетеді. Ал 20 қарашада «Барыс Аренада» Дима Биланның концерті жоспарланған.
Сонымен қатар, биыл «Астана Аренада» әлемге танымал әнші Энрике Иглесиас та өнер көрсетеді. Оның концерті елордадағы жылдың ең ірі музыкалық оқиғаларының бірі болмақ.
