ADYM.KZ / Қазақстанның Премьер-министрі Олжас Бектенов ресми сапармен келген Грузияның Премьер-министрі Ираклий Кобахидземен кездесіп, екіжақты стратегиялық әріптестікті одан әрі дамыту мәселелерін талқылады. Бұл туралы Үкіметтің баспасөз қызметі хабарлады.
Келіссөз барысында тараптар Қазақстан Президенті Қасым-Жомарт Тоқаев пен Грузия Премьер-министрі Ираклий Кобахидзе жоғары деңгейде қол жеткізген уағдаластықтарды іске асыру барысына ерекше назар аударды. Сондай-ақ сауда-экономикалық, инвестициялық, көлік-логистикалық, энергетикалық және цифрландыру салаларындағы ынтымақтастықты кеңейту мәселелері қаралды.
Олжас Бектенов Қазақстанның Грузияны Оңтүстік Кавказ бен Қара теңіз өңіріндегі сенімді досы әрі маңызды стратегиялық серіктесі ретінде бағалайтынын атап өтті.
«Сіздің ресми сапарыңыз екі ел арасындағы саяси диалогтің, өзара сенімнің және берік әріптестіктің жоғары деңгейін көрсетеді. Келіссөз Грузиямен практикалық ынтымақтастықты барлық бағыт бойынша одан әрі тереңдетуге дайын», – деді Үкімет басшысы.
Өз кезегінде Ираклий Кобахидзе Қазақстанның Грузия үшін негізгі стратегиялық серіктестердің бірі екенін айтып, екі ел арасындағы тарихи достық байланыстардың өзара тиімді ынтымақтастықты дамытуға берік негіз қалайтынын жеткізді.
«Қазақстан – Грузия үшін өте маңызды серіктес. Біз Қазақстанда жүргізіліп жатқан жаңғырту үдерістерін жіті бақылап отырмыз және барлық бағыт бойынша ынтымақтастықтың одан әрі кеңейетініне сенімдіміз», – деді Грузия Премьер-министрі.
Кездесу барысында экономиканың басым бағыттарындағы бірлескен жобаларды іске асыру мәселелері талқыланды. Әсіресе, технологиялық әріптестікті дамытуға басымдық беріліп, жасанды интеллект саласындағы бірлескен бастамалар мен цифрлық жобаларға ерекше назар аударылды. Сонымен қатар көлік-логистика инфрақұрылымын дамыту және транзиттік әлеуетті арттыру бағытындағы өзара іс-қимылды күшейту жөнінде пікір алмасылды.
Келіссөз қорытындысында Қазақстан мен Грузия үкіметтері стратегиялық әріптестікті одан әрі нығайтуға және өзара тиімді барлық бағыттар бойынша бірлескен жобаларды жүзеге асыруға дайын екенін растады.
