ADYM.KZ / Қазақстанда пластикалық хирургия қызметін көрсететін медициналық ұйымдарға қатысты мемлекеттік бақылау күшейтіледі. Бұл туралы Денсаулық сақтау министрлігі хабарлады.
Министрліктің мәліметінше, медициналық ұйымдардың қызметіне бақылауды күшейту мақсатында ҚР Бас прокуратурасымен келісім негізінде пластикалық хирургия қызметін көрсететін клиникаларда қосымша жоспардан тыс тексерулер жүргізу жоспарланып отыр.
Ведомствоның хабарлауынша, кешенді тексеру барысында заң бұзушылықтар анықталған жағдайда, қолданыстағы заңнамаға сәйкес тиісті шаралар қабылданады.
Денсаулық сақтау министрлігі Медициналық және фармацевтикалық бақылау комитетінің аумақтық департаменттері 2021 жылдан бері пластикалық хирургия саласында қызмет көрсететін медициналық ұйымдарға 92 жоспардан тыс тексеру жүргізген. Оның басым бөлігі 2024 жылы азаматтардан медициналық көмектің сапасы мен қауіпсіздігіне қатысты шағымдар мен өтініштердің көбеюіне байланысты ұйымдастырылған.
Тексеру нәтижесінде лицензиялық талаптардың сақталмауы, медициналық көмекті ұйымдастыру стандарттарының бұзылуы және медициналық құжаттаманы жүргізу қағидаларының орындалмауы сияқты заң бұзушылықтар анықталған. Сонымен қатар кейбір медициналық ұйымдардың қажетті рұқсат құжаттарынсыз қызмет көрсеткені белгілі болды.
Анықталған заң бұзушылықтарды жою үшін Комитеттің аумақтық департаменттері міндетті орындалуға тиіс нұсқамалар берген. Сондай-ақ әкімшілік құқық бұзушылықтар бойынша 24 хаттама толтырылып, жалпы сомасы 4,8 млн теңге көлемінде айыппұл салынған.
Министрлік мәліметінше, жоспардан тыс тексерулер пластикалық операциядан кейін адам өліміне әкелген жекелеген оқиғалар бойынша да жүргізілген. Мұндай жағдайлар көбіне Алматы мен Астана қалаларында, сондай-ақ Маңғыстау облысында тіркелген.
Тексеру қорытындылары бойынша материалдар заңнамаға сәйкес тиісті процестік шешім қабылдау үшін құқық қорғау органдарына жолданған.
