ADYM.KZ / Шымкент қаласында «Қауіпсіз жол» жедел-профилактикалық іс-шарасы аясында жастар мен жасөспірімдердің жолдағы қауіпсіздік мәдениетін қалыптастыруға бағытталған кезекті профилактикалық кездесу өтті.
Шымкент қаласы Полиция департаменті басшысының тапсырмасына сәйкес ұйымдастырылған іс-шара «Заң мен Тәртіп» қағидатын қамтамасыз ету, жол қозғалысы қауіпсіздігін арттыру және құқық бұзушылықтардың алдын алу мақсатында өткізілді.
Кездесуге «Жас сақшы» және «Жас жол инспекторлары» қозғалысының белсенді қатысушылары қатысты. Полиция қызметкерлері жастарға жол қозғалысы ережелерін сақтау, қоғамдық орындардағы тәртіп, жеке жауапкершілік және құқықтық мәдениетті қалыптастыру мәселелері бойынша жан-жақты түсіндіру жұмыстарын жүргізді.
Іс-шара барысында жолдағы қауіпсіздіктің әрбір азаматтың тәртібі мен жауапкершілігіне тікелей байланысты екені атап өтілді. Әсіресе, жасөспірімдер арасында кеңінен қолданылып жүрген самокаттар мен мопедтерді пайдалану кезінде қауіпсіздік талаптарын сақтау мәселесіне ерекше назар аударылды. Веложолдарда және жолдың басқа да бөліктерінде қозғалу тәртібі, қорғаныс құралдарын пайдалану, белгіленген ережелерді бұзудың ықтимал салдары нақты мысалдар арқылы түсіндірілді.
Кездесудің тәжірибелік әрі әсерлі бөліктерінің бірі – жол-көлік оқиғалары салдарынан зақымданған автокөліктер мен мопедтердің көрнекі түрде көрсетілуі болды. Бұл жасөспірімдерге жол қозғалысы ережелерін елемеу мен жауапсыздықтың қандай ауыр зардаптарға әкелуі мүмкін екенін нақты ұғындыруға мүмкіндік берді.
Полиция қызметкерлері жол-көлік оқиғаларының алдын алу тек тәртіп сақшыларының ғана емес, барлық жол қозғалысына қатысушылардың ортақ міндеті екенін атап өтті. Осы ретте «Жас сақшы» мен «Жас жол инспекторлары» қозғалысының қатысушылары өз қатарластары арасында қауіпсіздік талаптарын насихаттауда маңызды рөл атқаратыны айтылды.
Шара барысында қатысушыларға жол қозғалысы ережелерін сақтау – тек әкімшілік талап емес, ең алдымен адам өмірі мен денсаулығына деген жауапкершілік екені түсіндірілді. Жастар тарапынан қойылған сұрақтарға жауап беріліп, күнделікті өмірде кездесетін түрлі жол-көлік жағдайлары талқыланды.
Аталған бастама жасөспірімдердің құқықтық сауаттылығын арттыруға, жол қозғалысы мәдениетін қалыптастыруға, жауапкершілік сезімін күшейтуге және қоғамдық қауіпсіздікті нығайтуға бағытталған жүйелі профилактикалық жұмыстардың бір бөлігі болып табылады.
Шымкент қаласы Полиция департаменті алдағы уақытта да жол қауіпсіздігін қамтамасыз ету, құқық бұзушылықтардың алдын алу және жастар арасында заңға құрмет пен жауапкершілік мәдениетін қалыптастыру бағытындағы профилактикалық іс-шараларды тұрақты түрде жалғастырады.
