ADYM.KZ / Қытайдағы жасанды интеллект (ЖИ) чиптері нарығында америкалық Nvidia компаниясының позициясы әлсіреп келеді. Бұған АҚШ енгізген экспорттық шектеулер мен жергілікті Huawei компаниясының қарқынды дамуы себеп болған. Бұл туралы ABC News хабарлады.
Вашингтонның Nvidia-ның озық ЖИ-чиптерін Қытайға жеткізуіне шектеу қоюы қытайлық өндірушілердің өз технологияларын жедел дамытуына мүмкіндік берді. Соның нәтижесінде Huawei компаниясы нарықтағы үлесін едәуір арттырып, Nvidia-мен тең деңгейге жақындады.
Қор нарығы мен брокерлік операцияларды зерттейтін Bernstein сарапшыларының есебіне сәйкес, 2025 жылы Nvidia-ның Қытайдағы ЖИ-чиптері нарығындағы үлесі шамамен 40 пайызды құраған. Бұл көрсеткіш Huawei үлесімен шамалас.
Алайда сарапшылардың болжамынша, биыл Nvidia-ның нарықтағы үлесі 8 пайызға дейін төмендеуі мүмкін. Ал Huawei-дің үлесі шамамен 50 пайызға дейін өседі деп күтілуде.
Сала мамандары Huawei компаниясының жаңа Ascend 950 сериялы ЖИ-чиптерінің өнімділігі Nvidia-ның ең қуатты өнімдерінің бірі саналатын H200 чипімен бәсекелесе алатынын айтады.
Бұған қоса, OpenAI әзірлеген ChatGPT және Anthropic компаниясының Claude жүйелеріне қытайлық бәсекелес саналатын DeepSeek компаниясы сәуір айында таныстырған V4 жасанды интеллект моделінің Huawei-дің Ascend чиптеріне бейімделгенін мәлімдеді.
Morningstar сарапшысы Феликс Лидің пікірінше, Қытайда өндірілген жаңа буын чиптері алдағы уақытта Nvidia өнімдерін толыққанды алмастыра алатын деңгейге жетуі мүмкін.
