ADYM.KZ / Үндістанның Ахмедабад қаласында өтіп жатқан волейболдан ерлер арасындағы Азия кубогында Қазақстан құрамасы топтық кезеңдегі соңғы матчын жеңіспен аяқтады.
Сергей Трикоз жаттықтыратын ұлттық құрама А тобының қорытынды кездесуінде Жаңа Зеландия құрамасымен кездесіп, 3:1 есебімен басым түсті.
Қазақстандықтар алғашқы екі партияда 25:21 және 25:19 есебімен жеңіске жетті. Үшінші сетте қарсылас 25:22 есебімен басым болғанымен, төртінші партияда отандастарымыз дәл осы есеппен жеңіп, матчты өз пайдасына аяқтады.
Осы нәтижеден кейін Қазақстан құрамасы А тобында 8 ұпай жинап, үшінші орынға тұрақтады. Енді ұлттық құрама турнирдің 5–8 орындары үшін өтетін кездесулерде бақ сынайды.
Ал А тобынан Үндістан мен Бахрейн құрамалары жартылай финалға жолдама алды.
Еске салайық, бұған дейін Қазақстан құрамасы Азия кубогында Аустралия мен тағы бір қарсыласын камбэк жасап жеңген болатын. Сондай-ақ топтық кезеңде Бахрейн құрамасына тартысты кездесуде есе жіберді.
