ADYM.KZ / Астана мен Бішкек дипломатиялық өкілдіктердің жұмыс істеуі үшін қолайлы жағдай жасау мақсатында өзара келісімге келді. Мәжіліс депутаттары екі ел арасындағы елшіліктер мен резиденцияларға арналған жер учаскелерін өтеусіз пайдалануға беру туралы заң жобасын ратификациялады.
Бұл келісімге 2025 жылдың 22 тамызында Қазақстан Президенті Қасым-Жомарт Тоқаевтың Қырғызстанға жасаған сапары барысында қол қойылған болатын. Құжатқа сәйкес, тараптар Астана мен Бішкек қалаларындағы ғимараттар мен жер аумақтарын 49 жыл мерзімге ұзарту құқығымен өзара тегін пайдалануға береді. Сыртқы істер министрінің орынбасары Әлібек Қуантыровтың айтуынша, бұл шара дипломатиялық өкілдіктердің қызметін тиімді ұйымдастыруға жол ашады.
Бөлінген жер аумақтары: Қазақстанның Қырғызстандағы Елшілігіне: 0,75 га; Қазақстан Елшісінің резиденциясына: 0,17 га; Қырғызстанның Қазақстандағы Елшілігіне: 0,74 га; *Қырғызстан Елшісінің резиденциясына: 0,125 га.
Министр орынбасары бұл қадам екі ел арасындағы саяси диалог пен өзара сенімді нығайтуға, сондай-ақ дипломатиялық қатынастардың дамуына тың серпін беретінін атап өтті. Мәжіліс отырысында ратификацияланған заң жобасы алдағы уақытта дипломатиялық миссиялардың тұрақты жұмыс істеуі үшін қажетті құқықтық негізді қамтамасыз етеді.
