ADYM.KZ / Қазақстанда жаңбырлатып суару машиналарын өндіру жобасы іске асырылуда. Бұл туралы Премьер-министрдің орынбасары – Ұлттық экономика министрі Серік Жұманғариннің Valmont Industries компаниясының Еуразия және Латын Америкасы бойынша аймақтық вице-президенті Филипп Шмидт-Хольцман бастаған делегациямен кездесуі барысында белгілі болды.
Кездесуде суармалы егіншілікті дамыту, су үнемдеу технологияларын енгізу және әлемдегі ірі ирригациялық жабдық өндірушілерінің бірі саналатын Valmont Industries компаниясының VALLEY жаңбырлатып суару машиналарын Қазақстанда жергіліктендіру жобасы талқыланды.
Серік Жұманғарин суармалы жерлер көлемін ұлғайту агроөнеркәсіп кешенін дамытудың негізгі басымдықтарының бірі екенін атап өтті.
– Қазақстанның ауыл шаруашылығы саласында зор әлеует бар. Мемлекет басшысының суармалы жерлер көлемін арттыру жөніндегі тапсырмасын ескере отырып, заманауи ирригациялық техника өндірісін дамыту ерекше маңызды. Valmont Industries жобасы фермерлер үшін қажетті жабдықтарды жеткізу мерзімін едәуір қысқартады, – деді вице-премьер.
Қазіргі уақытта VALLEY суару машиналарын жергілікті құрастыру жобасы соңғы кезеңге жетті. Өндірістік алаң «Имсталькон» АҚ базасында құрылған. Мұнда қажетті инфрақұрылым толық дайындалып, кедендік және еркін қойма режимдері қарастырылған.
Жобаның нарықтық әлеуеті де жоғары бағалануда. Қарағанды облысының өзінде шамамен 250 жаңбырлатып суару машинасын өндіруге арналған жобалар портфелі қалыптасқан. Бұл 25 мың гектарға жуық ауыл шаруашылығы алқабын суаруға мүмкіндік береді.
Кездесу барысында өндірісті жергіліктендіру ауыл шаруашылығы өндірушілерінің заманауи техникаға қолжетімділігін арттырып, жабдық жеткізу мерзімін қысқартатыны атап өтілді. Сондай-ақ бұл жоба Қазақстанда су үнемдеу технологияларын енгізу мен суармалы егіншілікті дамытуға серпін бермек.
Кездесу қорытындысында Серік Жұманғарин Ауыл шаруашылығы министрлігіне мүдделі мемлекеттік органдар және өңір әкімдіктерімен бірлесіп, өндірісті жергіліктендіру жұмыстарын жалғастыруды және фермерлердің заманауи ирригациялық техникаға қолжетімділігін арттыру бағытында инвесторлармен жұмысты күшейтуді тапсырды.
