Шымкент қаласында тұрғындар мен жастардың мемлекеттік қолдау шаралары туралы хабардарлығын арттыру мақсатында ақпараттық-түсіндіру жұмыстары ұйымдастырылды, деп Adym.kz ақпараттық сайты қалалық Жастар саясаты басқармасының Жастар ресурстық орталығының баспасөз қызметіне сілтеме жасап.
Шымкент қаласы Жастар саясаты басқармасының «Жастар ресурстық орталығы» КММ мамандары «Ақбар» базарында қала тұрғындары мен жастарға мемлекеттік бағдарламалар мен жұмыспен қамту мүмкіндіктері жөнінде ақпарат берді.
Кездесудің негізгі мақсаты – жастарға мемлекеттік қолдау тетіктерін кеңінен таныстыру, жұмыссыздық деңгейін төмендетуге бағытталған бағдарламалар туралы түсінік қалыптастыру және олардың еңбек нарығына бейімделуіне ықпал ету. Сондай-ақ тұрғындардың мемлекеттік бағдарламаларға қатысу мүмкіндіктерін түсіндіріп, жұмысқа орналасу жолдары туралы қажетті мәліметтер ұсыну көзделді.
Ақпараттық кездесу барысында мамандар жастарды жұмыспен қамтуға бағытталған «Жастар практикасы», «Алғашқы жұмыс орны», «Ақылы қоғамдық жұмыстар» және басқа да мемлекеттік бағдарламалардың негізгі бағыттарына тоқталды.
Атап айтқанда, «Жастар практикасы» бағдарламасы жоғары және арнаулы орта оқу орындарының түлектеріне алған мамандығы бойынша алғашқы еңбек тәжірибесін жинақтауға мүмкіндік береді. Ал «Алғашқы жұмыс орны» жобасы еңбек жолын енді бастаған жастарды тұрақты жұмыспен қамтуға бағытталған. Сонымен қатар «Ақылы қоғамдық жұмыстар» бағдарламасы уақытша жұмыспен қамтуды қамтамасыз етіп, азаматтардың еңбек тәжірибесін арттыруға жағдай жасайды.
Мамандар қатысушыларға аталған бағдарламалардың талаптары, өтінім беру тәртібі, қатысу шарттары мен қарастырылған мүмкіндіктері жөнінде жан-жақты түсіндірді. Тұрғындар өздерін толғандырған сұрақтарын қойып, жұмысқа орналасу, қажетті құжаттарды рәсімдеу және мемлекеттік қолдау шараларын пайдалану тәртібі бойынша жауап алды.
Мұндай ақпараттық-түсіндіру жұмыстары тұрғындардың мемлекеттік бағдарламалар туралы ақпаратқа қолжетімділігін арттыруға, жастардың жұмыспен қамтылуына және кәсіби тұрғыдан қалыптасуына ықпал етеді.
Жастар ресурстық орталығы алдағы уақытта да қала тұрғындары мен жастар арасында мемлекеттік қолдау шараларын кеңінен насихаттап, жұмыспен қамту бағытындағы ақпараттық кездесулерді жалғастырады.
