Астана. Мемлекет басшысы Қасым-Жомарт Тоқаев АҚШ Президентінің Оңтүстік және Орталық Азия бойынша арнайы өкілі Серджио Гормен кездесу өткізді, — деп хабарлайды Adym.kz ақпараттық сайты Ақордаға сілтеме жасап.
Кездесу барысында Президент Қазақстан мен АҚШ арасындағы ынтымақтастықтың жоғары деңгейде дамып келе жатқанын атап өтіп, екі ел арасындағы кеңейтілген стратегиялық серіктестікті одан әрі нығайтуға Қазақстанның мүдделі екенін жеткізді.
Өз кезегінде Серджио Гор қабылдау үшін алғыс айтып, АҚШ Президенті Дональд Трамптың сәлемін жолдады.
Тараптар сауда-экономикалық және инвестициялық ынтымақтастықты дамыту мәселелерін талқылап, бірлескен жобаларды жүзеге асыру перспективаларына тоқталды. Әсіресе аса маңызды минералдар өндіру, көлік-логистика, цифрландыру және басқа да басым бағыттардағы әріптестікті кеңейтуге назар аударылды.
Кездесуде Қазақстан тең құрылтайшыларының бірі саналатын Бейбітшілік кеңесі қызметі де сөз болды. Мемлекет басшысы еліміздің халықаралық тұрақтылықты нығайтуға және гуманитарлық бастамаларды ілгерілетуге белсенді үлес қосуға дайын екенін мәлімдеді.
Сонымен қатар тараптар өңірлік және жаһандық күн тәртібіндегі өзекті мәселелер жөнінде пікір алмасты.
Кездесу қорытындысында Қасым-Жомарт Тоқаев пен Серджио Гор қазақ-америкалық ынтымақтастықты одан әрі тереңдетуге өзара мүдделі екенін растады.
