ADYM.KZ / Бала сүюді армандаған қазақстандық отбасыларға қолдау көрсету бастамасы бүгінде үлкен қайырымдылық миссиясына айналды. Алғаш рет 2023 жылы «Jibek Joly» телеарнасында журналист, қоғам қайраткері Ләйлә Сұлтанқызының жүргізуімен басталған «Ана болғым келеді» әлеуметтік жобасы жүйелі түрде жалғасып, «Мәриям Қазақстан» қайырымдылық қорының құрылуына негіз болған еді. Бүгін қор өзінің үш жылдық қызметінің айтулы қорытындысын жариялады.
Телеарнаның тікелей қолдауымен алғашқы кезеңде 15 отбасыға көмек көрсетіліп, нәтижесінде 13 сәби өмірге келсе, қазіргі таңда бұл көрсеткіш еселене түсті.
Қордың басты мақсаты бедеулік диагнозымен бетпе-бет келген отандастарымызға ЭКО бағдарламасы арқылы ата-ана болу бақытын сыйлау. Ұйым құрылған күннен бастап еліміздің түкпір-түкпірінен 2 000-ға жуық өтініш келіп түскен.
Тек 2024 жылы қордың жаңа сайты іске қосылғаннан кейін, бір жылдың ішінде ғана көмекке мұқтаж жандардан 790 өтінім қабылданды. Медициналық көрсеткіштер мен белгіленген іріктеу талаптарына толық сәйкес келген 70 отбасы арнайы бағдарламаға қатысуға жолдама алды. Бүгінгі таңда қордың тікелей қолдауының арқасында 25 отбасы зарыға күткен ата-ана мәртебесіне қол жеткізіп үлгерді. Қайырымдылық жобасы аясында жасалған емдік шаралардың нәтижесінде, қазіргі уақытта 26 сәби қордың қолдауымен дүние есігін ашты.
Сонымен қатар, дәл қазіргі уақытта тағы 11 отбасы құрсақ шапағатын сезініп, жақын арада өмірге келетін сәбилерін үлкен үмітпен күтуде.
«Әр өтініштің артында үлкен үміт, ұзақ күту мен күрделі тағдыр тұр», — дейді қор төрағасы, Астана қалалық мәслихатының депутаты Ләйлә Сұлтанқызы.
Қор бағдарламасына қатысушылардың жас ерекшелігі әртүрлі. Ішкі статистика мәліметінше, ең жас қатысушы ерлі-зайыптылар — 25 жаста болса, ең ересек үміткерлердің жасы 45-47 жас аралығын құрайды.
Бағдарламаға қатысушыларды іріктеу бірнеше күрделі кезеңнен тұрады:
Бағдарламаға қатысу процесінің алғашқы кезеңінде үміткерлер тарапынан келіп түскен барлық құжаттарды арнайы мамандар мұқият алдын ала тексеруден өткізеді.
Одан кейін құрамында репродуктологтар, андрологтар, урологтар, эмбриологтар, эндокринологтар мен психологтар бар 9 маманнан жасақталған білікті комиссия консилиум өткізіп, әрбір отбасының жағдайын жеке-жеке талқылауға алады.
Ал бағдарламаға кімдердің жолдама алатыны туралы түпкілікті шешімді Астанадағы «ECOMED» клиникасының медициналық директоры Алмас Ибрагимов бастаған дәрігерлер тобы мен қордың Қамқоршылық кеңесі бірлесе отырып қабылдайды.
ЭКО процедурасы тек медициналық емес, сонымен бірге үлкен эмоционалдық дайындықты талап ететіндіктен, 2026 жылдан бастап бағдарламаға психологиялық сүйемелдеу енгізілді. Бұл қадам болашақ ата-аналарға ең маңызды кезеңде психологиялық тұрғыдан қолдау көрсетіп, стрессті еңсеруге көмектеседі.
«Адамның бәр қызығы бала деген» деген хакім Абайдың сөзі қор қызметінің басты өзегіне айналған. Үш жыл ішінде өмірге келген 26 сәби мен жақын арада туылатын 11 нәресте — осы ізгі миссияның ең үлкен, нақты жеңісі.
«Мәриям Қазақстан» қайырымдылық қоры Қазақстан азаматтары үшін толықтай ашықтық пен есептілік қағидаттарына сүйене отырып, алдағы уақытта да жұмысын жалғастыра бермек.
