АСТАНА — ADYM.KZ / Астана мен Гонконг арасындағы экономикалық байланыстар жаңа деңгейге көтерілмек. Қазақстан Президенті Қасым-Жомарт Тоқаев елімізге алғаш рет ресми сапармен келген Гонконг Арнаулы әкімшілік ауданының Басшысы Джон Лиді қабылдады. Саяси сарапшылар бұл кездесуді екіжақты қатынастардың жаңа парағы деп бағалап отыр.
Қасым-Жомарт Тоқаев мәртебелі мейманға ілтипат білдіре отырып, Гонконг жетекшісінің Қазақстанға жасаған бұл алғашқы қадамының мәні өте жоғары екенін қадап айтты. Президенттің пайымдауынша, бұл дипломатиялық уақиға Қазақстан мен Қытай арасындағы мәңгілік жан-жақты стратегиялық серіктестікті одан әрі бекемдей түспек.
«Бүгінде елдеріміз арасында жоғары деңгейдегі саяси диалог қалыптасып, сауда-экономикалық және инвестициялық ықпалдастық қарқынды дамып келеді. Гонконгпен қарым-қатынасымыз туралы да дәл осылай сеніммен айтуға болады»,- деді Мемлекет басшысы.
Өз кезегінде Джон Ли бұл сапарға ерекше мән беретінін жеткізді. Оның айтуынша, бұл жолғы делегация — ол басқарған шетелдік сапарлардың ішіндегі ең ірісі әрі ауқымдысы. Астанаға Гонконгтың логистика, «жасыл» энергетика, тау-кен өнеркәсібі, инновация, технология және білім беру салаларын қамтитын 75 ресми тұлғасы мен ірі кәсіпкері бірге келген. Бұл Гонконг бизнес-элитасының Қазақстан нарығына деген жоғары қызығушылығын көрсетеді.
Қасым-Жомарт Тоқаев Гонконгтың әлемдік қаржы және іскерлік орталық ретіндегі рөліне тоқталып, Қазақстанның бірлескен жобаларды жүзеге асыруға дайын екенін мәлімдеді. Тараптар алдағы уақытта мына негізгі бес бағыт бойынша серіктестікті арттырмақ: Инвестиция және қаржы: Жаңа бірлескен жобаларды қаржыландыру; Цифрландыру және Жасанды интеллект (AI): Озық технологиялық шешімдерді енгізу; Көлік-логистика: Екі аймақ арасындағы транзиттік әлеуетті арттыру; «Жасыл» энергетика: Экологиялық таза технологияларды дамыту; Білім беру: Мамандар даярлау және тәжірибе алмасу.
Джон Ли өз сөзінде ҚХР Төрағасы Си Цзиньпиннің Қазақстанда жариялаған «Бір белдеу, бір жол» жаһандық бастамасына ерекше тоқталды. Ол Гонконгтың бұл жобаны ілгерілетуге белсенді атсалысып жатқанын және өңіраралық байланыстардың кеңеюі екі тарапқа да мол табыс әкелетінін айтты. Кездесу соңында қос тарап сауда-экономикалық ынтымақтастықты одан әрі жандандыруға өзара мүдделі екендіктерін растап, нақты жобаларды пысықтауға уағдаласты.
