ADYM.KZ / Шымкент қаласының Қаратау ауданы аумағында кәмелетке толмаған жасөспірімдердің түнгі уақытта заңды өкілінсіз жүруінің алдын алу мақсатында рейдтік іс-шара ұйымдастырылды.
Рейдтің негізгі мақсаты – жасөспірімдер арасындағы құқық бұзушылықтардың алдын алу, олардың қауіпсіздігін қамтамасыз ету және ата-аналардың бала тәрбиесіне қатысты жауапкершілігін арттыру.
Іс-шара барысында жауапты мамандар аудан аумағындағы қоғамдық орындар мен көшелерді аралап, түнгі уақытта жүрген жасөспірімдермен профилактикалық әңгіме жүргізді. Оларға Қазақстан Республикасының заңнамасына сәйкес кәмелетке толмағандардың түнгі уақытта заңды өкілінсіз жүруіне шектеу қойылғаны түсіндірілді.
Атап айтқанда, кәмелетке толмағандарға сағат 22:00-ден кейін ойын-сауық орындарында, ал сағат 23:00-ден таңғы 06:00-ге дейін тұрғынжайдан тыс жерлерде заңды өкілінсіз жүруге болмайтыны ескертілді. Бұл талаптар жасөспірімдердің өмірі мен денсаулығын қорғауға, олардың түрлі келеңсіз жағдайларға тап болу қаупін азайтуға бағытталған.
Сонымен қатар рейд кезінде ата-аналар мен заңды өкілдерге балаларының бос уақытын тиімді ұйымдастыру, түнгі уақытта қайда жүргенін бақылау және қауіпсіздігіне бейжай қарамау қажеттігі айтылды. Бала тәрбиесіндегі ата-ананың жауапкершілігі мен отбасы бақылауының маңызы ерекше екені атап өтілді.
Мамандардың айтуынша, жасөспірімдер арасындағы құқық бұзушылықтың алдын алу тек уәкілетті органдардың ғана емес, ата-аналар мен қоғамның да ортақ міндеті. Сондықтан мұндай профилактикалық жұмыстардың жүйелі түрде жүргізілуі маңызды.
Түнгі рейд жұмыстары алдағы уақытта да жалғасып, жасөспірімдердің құқықтары мен қауіпсіздігін қорғауға, құқық бұзушылықтың алдын алуға бағытталады.
