ADYM.KZ / Тұран ауданы Төтенше жағдайлар басқармасы мен Жастар ресурстық орталығының қызметкерлері бірлесіп, көпқабатты тұрғын үйлерде балалардың терезеден құлап кету жағдайларының алдын алуға бағытталған ақпараттық-түсіндіру жұмыстарын жүргізді.
Іс-шараның негізгі мақсаты – ата-аналардың қауіпсіздік талаптарын сақтау жауапкершілігін арттыру, балалардың өмірі мен денсаулығына төнетін қауіп-қатердің алдын алу және тұрғындар арасында қауіпсіздік мәдениетін қалыптастыру.
Түсіндіру жұмыстары барысында мамандар тұрғындарға ашық терезелердің, москит торларының және терезе маңына қойылған жиһаздардың балалар үшін қаншалықты қауіпті екенін жеткізді. Әсіресе кішкентай балалардың қоршаған ортаға қызығушылығы жоғары болғандықтан, олардың терезе алдына өз бетінше шығуға әрекет жасауы ауыр жағдайларға әкелуі мүмкін екені ескертілді.
Сонымен қатар тұрғындарға балалардың терезеден құлап кетуінің алдын алуға арналған арнайы жадынамалар таратылды. Мамандар терезелерге қорғаныс бекіткіштерін орнатудың маңызын түсіндіріп, ата-аналарға күнделікті тұрмыста сақталуы тиіс қауіпсіздік шаралары жөнінде кеңес берді.
Атап айтқанда, кішкентай балаларды үйде, әсіресе терезесі ашық бөлмелерде қараусыз қалдырмау, терезе тұтқаларын балалардың қолы жетпейтін жерде ұстау, терезе алдына орындық, үстел және басқа да жиһаздарды қоймау қажеттігі айтылды. Сондай-ақ москит торлары баланың салмағын көтере алмайтыны, сондықтан оларды қорғаныс құралы ретінде пайдалануға болмайтыны ескертілді.
Мамандардың айтуынша, мұндай жазатайым оқиғалардың алдын алуда ата-аналардың сақтығы мен үй ішіндегі қауіпсіздік талаптарын орындауы ерекше маңызды. Баланың бір сәт назардан тыс қалуы орны толмас жағдайға әкелуі мүмкін. Сондықтан қауіпсіздік шараларын алдын ала ұйымдастырып, балаларға терезе маңында ойнауға болмайтынын түсіндіру қажет.
Айта кетейік, балалардың өмірі мен денсаулығын қорғау, тұрмыстық жарақаттанудың алдын алу бағытындағы ақпараттық-түсіндіру жұмыстары тұрғындар арасында қауіпсіздік мәдениетін қалыптастыруға және ата-аналардың жауапкершілігін арттыруға бағытталған.
