ADYM.KZ / City саябағы кезекті рет қала тұрғындары мен жастары үшін нағыз мәдениет пен өнердің орталығына айналды. Мұнда тұрғындардың кешкі демалысын тиімді әрі мазмұнды өткізу мақсатында ұйымдастырылған дәстүрлі «Tynda Fest» караоке кеші өтті. Ашық аспан астындағы бұл шара музыка сүйер қауымның басын қосып, көпшілікке ұмытылмас әсер сыйлады.
Кеш барысында саябаққа серуендеп келген үлкен-кіші караоке алаңына жиналып, өздерінің сүйікті әндерін шырқады. Репертуарда қазақ эстрадасының хит әндерінен бастап, шетелдік танымал туындыларға дейін орындалды. Әрбір қатысушы сахнада өзін еркін сезініп, өз өнерін ортаға салды. Музыка мен жарықпен әрленген сахна, көрермендердің қосыла шырқаған дауысы саябақ ішіне ерекше жылылық пен мерекелік атмосфера қалыптастырды.
Шараға қатысқан қала жастары мұндай бастамалардың маңыздылығын ерекше атап өтіп, өз әсерлерімен бөлісті:
«Бүгінгі кеш керемет өтті! Достарыммен бірге саябаққа жай ғана серуендеуге шыққанбыз, бірақ мынадай керемет караоке кешінің үстінен түстік. Өзіміздің сүйікті әндерімізді айтып, кәдімгідей демалып, бір серпіліп қалдық. Қалада осындай ашық форматтағы, жастардың басын қосатын тегін шаралардың көп болғаны қуантады», – дейді қала тұрғыны, студент Аружан.
Ал тағы бір жас қатысушы Мақсат өзінің сахнадағы тәжірибесі туралы айтып берді: «Мен өзім ән айтқанды жақсы көремін, бірақ көпшілік алдына шығып көрмеппін. «Tynda Fest» маған сол мүмкіндікті бергендей болды. Халықтың қосылып ән шырқағаны, қолдауы маған ерекше шабыт сыйлады. Мұндай кештер күнделікті күйбең тірліктен арылып, позитивті энергия алуға таптырмас орын».
«Tynda Fest» сияқты мәдени іс-шаралар тек көңіл көтеру ғана емес, сонымен қатар қала тұрғындарының өзара қарым-қатынасын нығайтып, жастардың шығармашылық әлеуетін ашуға таптырмас алаң болып отыр. Ұйымдастырушылардың айтуынша, алдағы уақытта да City саябағы осындай жарқын әрі мазмұнды кештердің тұрақты мекеніне айналмақ.
