ADYM.KZ / Шымкентте жастар мен тұрғындардың діни сауаттылығын арттыру, деструктивті діни ағымдардың алдын алу және қоғамда зайырлы құндылықтарды нығайту бағытында түсіндіру жұмыстары жүргізілді.
Іс-шараны Шымкент қаласы Жастар саясаты басқармасына қарасты «Жастар ресурстық орталығы» КММ ұйымдастырды. Кездесу Металлург саябағында өтіп, оған «Дін мәселелерін зерттеу орталығы» КММ-нің теолог маманы қатысты.
Түсіндіру барысында маман тұрғындарға деструктивті діни идеологиялардың негізгі белгілері мен олардың адам санасына тигізуі мүмкін кері әсері туралы айтып берді. Сондай-ақ әлеуметтік желілер мен интернет кеңістігінде таралатын діни мазмұндағы ақпаратты сын тұрғысынан қабылдау, күмәнді дереккөздерге сенбеу және діни мәселелер бойынша ақпаратты білікті мамандардан алу қажеттігі түсіндірілді.
Жастармен әңгімелесу кезінде түрлі діни радикалды топтардың адамдарды өз қатарына тарту тәсілдеріне де назар аударылды. Мамандар діни сауатсыздықтың жалған діни түсініктердің таралуына жол ашуы мүмкін екенін айтып, кез келген ақпаратқа байыппен қарап, оның шығу тегін тексерудің маңыздылығын атап өтті.
Кездесу барысында тұрғындар өздерін қызықтырған сұрақтарын қойып, дін саласына қатысты мәселелер бойынша маманнан жауап алды. Қатысушыларға діни сауаттылықты арттыруға арналған ақпараттық және жадынамалық парақшалар таратылды.
Мұндай профилактикалық шаралар жастардың діни мәселелерге қатысты дұрыс көзқарасын қалыптастыруға, деструктивті идеологияның алдын алуға және қоғамдағы тұрақтылық пен қауіпсіздікті нығайтуға бағытталған.
Ұйымдастырушылардың айтуынша, діни сауаттылықты арттыру – жат идеологиялардың ықпалына тосқауыл қоюдың маңызды тетіктерінің бірі. Осы бағыттағы ақпараттық-түсіндіру жұмыстары алдағы уақытта да жалғасын табады.
