ADYM.KZ / Шымкентте жастар арасында есірткіге тәуелділіктің алдын алу және салауатты өмір салтын насихаттау мақсатында «Жан Дауa» психологиялық драмасы сахналанды.
Шымкент қаласы Полиция департаментінің ұйымдастыруымен өткен іс-шара «Есірткісіз болашақ – жарқын болашақ» форумы аясында өтті. Қойылымның басты мақсаты – жастарға есірткі қолданудың адам өміріне әкелетін ауыр зардабын көркем шығарма арқылы түсіндіру және қауіпті әдеттердің алдын алу.
Психологиялық драма барысында есірткіге тәуелділіктің адамның денсаулығы мен психологиялық жағдайына ғана емес, оның отбасы мен жақындарының өміріне де кері әсері көрсетілді. Сахналық қойылым арқылы жастарға бір сәттік әуестік пен жауапсыз шешімнің орны толмас салдарға әкелуі мүмкін екені жеткізілді.
Ұйымдастырушылардың айтуынша, жастар арасында құқық бұзушылық пен есірткі қылмысының алдын алуда ақпараттық-түсіндіру жұмыстарымен қатар, осындай шығармашылық тәсілдердің де маңызы зор. Себебі көркем қойылымдар арқылы күрделі мәселені жастарға түсінікті әрі әсерлі түрде жеткізуге мүмкіндік бар.
Іс-шара барысында мамандар есірткі қылмысының алдын алу, заң талаптарын сақтау және есірткі заттарын қолданудың құқықтық салдары жөнінде түсіндіру жұмыстарын жүргізді. Сонымен қатар жастарға салауатты өмір салтын ұстану, бос уақытын тиімді пайдалану және түрлі зиянды әдеттерден аулақ болудың маңызы айтылды.
Форум соңында сала мамандары жастардың сұрақтарына жауап беріп, есірткіге тәуелділіктің алдын алу бағытында атқарылып жатқан жұмыстар туралы ақпарат берді.
Мұндай профилактикалық іс-шаралар жастардың құқықтық және әлеуметтік жауапкершілігін арттырып, есірткіге қарсы иммунитет қалыптастыруға бағытталған. «Жан Дауa» қойылымы да жас буынды қауіптің салдарын алдын ала түсінуге және өз өмірі мен болашағына жауапкершілікпен қарауға үндеді.
