ADYM.KZ / Қытайдың Гуанчжоу қаласында 30-шы рет ұйымдастырылып отырған Оңтүстік Қытай кітап көрмесі салтанатты түрде ашылды. Қытайдағы кітап және баспа ісі саласындағы ірі мәдени алаңдардың бірі саналатын халықаралық көрмеге Қазақстан екінші жыл қатарынан қатысып, ұлттық павильонын таныстырды.
Көрменің ашылу салтанатына Қазақстан Республикасы Мәдениет және ақпарат министрлігінің, дипломатиялық корпус пен Қытайдың мәдениет және баспа саласының өкілдері қатысты.
Ұлттық павильонда 100-ге жуық кітап ұсынылды
Қазақстанның ұлттық павильонында қазіргі қазақ әдебиеті, балалар әдебиеті, мәдени мұра және креативті индустрия салаларын қамтитын 100-ге жуық кітап пен мәдени өнім көпшілік назарына ұсынылды.
Экспозициядан ұлы ойшыл Абай Құнанбайұлының, көрнекті жазушы Мұхтар Әуезовтің, ғалым-ағартушылар Шоқан Уәлиханов пен Ыбырай Алтынсариннің, ұлт ұстазы Ахмет Байтұрсынұлының шығармашылығы мен рухани мұрасына арналған басылымдар орын алды.
Сондай-ақ көрмеге келген қонақтарға қазақ халқының эпостық және фольклорлық мұрасы, ұлттық салт-дәстүрі, қолөнері, ұлттық киімдері мен тағамдары, киіз үй мәдениеті туралы кітаптар таныстырылды.
Бұл экспозиция қазақ халқының бай рухани мұрасы мен мәдени ерекшеліктерін халықаралық аудиторияға кеңінен танытуға бағытталған.
«Түркістан» және Димашқа арналған кітаптардың тұсаукесері өтті
Көрме аясында «Түркістан» және «Шексіз музыка: Димаш» кітаптарының таныстырылымы ұйымдастырылды.
Сонымен бірге қонақтарға қазақтың дәстүрлі қолөнер бұйымдары көрсетіліп, ұлттық мәдениеттің ерекшеліктері таныстырылды. Арнайы мәдени бағдарлама арқылы Қазақстанның әдебиеті, өнері мен рухани құндылықтарын Қытай оқырмандарына жақыннан таныстыру көзделді.
Қазақ және қытай әдебиетінің 30-ға жуық туындысы аударылады
Қазақстан мен Қытай арасындағы әдеби-мәдени байланыс соңғы жылдары жаңа деңгейге көтеріліп келеді.
Биыл Қазақстан Республикасы Мәдениет және ақпарат министрлігі мен Қытай Халық Республикасының Мемлекеттік баспасөз және баспа істері басқармасы классикалық шығармаларды аудару және басып шығару саласындағы ынтымақтастық туралы меморандумға қол қойған болатын.
Құжат аясында алдағы бес жыл ішінде қазақ және қытай әдебиетінің 30-ға жуық туындысын аударып, басып шығару жоспарланған. Бұл бастама екі ел оқырмандарының бір-бірінің әдебиеті мен мәдениетін тереңірек танып-білуіне мүмкіндік береді.
Қазақстанның Гуанчжоудағы мәдени бағдарламасы ҚР Мәдениет және ақпарат министрлігінің, Бейжіңдегі Қазақстан мәдени орталығының, Qazaq-Oner ұлттық қауымдастығының, Қазақстанның Қытайдағы Елшілігінің, Гуанчжоудағы Бас консулдығының және Nomad Culture Foundation қорының қолдауымен ұйымдастырылды.
Оңтүстік Қытай кітап көрмесі 27-31 тамыз аралығында Гуанчжоу қаласындағы China Import and Export Fair Complex кешенінде өтеді.
Қазақстанның көрмеге қатысуы ұлттық әдебиет пен мәдени мұраны халықаралық деңгейде насихаттауға, сондай-ақ Қазақстан мен Қытай арасындағы мәдени-гуманитарлық ынтымақтастықты одан әрі дамытуға ықпал етпек.
