ADYM.KZ / FlyArystan әуекомпаниясы халықаралық бағыттар желісін кеңейтіп, Ақтау – Ереван – Ақтау бағыты бойынша тікелей әуе рейстерін қайта жандандырады.
Тікелей әуе қатынасы 2026 жылғы 16 желтоқсаннан бастап іске қосылады. Рейстер аптасына екі рет – сәрсенбі және жұма күндері орындалады.
Сәрсенбі күндері ұшақ Ақтаудан сағат 12:35-те ұшып, Ереванға 13:20-да қонады. Кері бағыттағы рейс Ереваннан 14:20-да ұшып, Ақтауға 17:00-де келеді.
Ал жұма күндері Ақтаудан ұшу уақыты 09:00-ге, Ереванға қону уақыты 09:40-қа жоспарланған. Кері рейс Ереваннан 10:40-та ұшып, Ақтауға 13:15-те келеді.
Барлық уақыт жергілікті уақыт бойынша көрсетілген.
Билеттер 41 мың теңгеден басталады
Ақтау – Ереван – Ақтау бағыты бойынша әуе билеттерінің құны бір бағытқа 41 мың теңгеден басталады.
Жаңа бағыт Қазақстан тұрғындарына Армения астанасына тікелей жетуге мүмкіндік береді. Сонымен қатар Ереван арқылы елдің тарихи және табиғи көрікті жерлеріне саяхат жасауға қолайлы жағдай тумақ.
Ереван – Арменияның астанасы әрі тарихы 2800 жылдан асатын көне қалалардың бірі. Қаланың танымал орындарының қатарында Ереван мен Арарат тауына көрініс ашылатын Каскад кешені және қала өмірінің негізгі орталықтарының бірі саналатын Республика алаңы бар.
Саяхатшылар Ереваннан Гарни ғибадатханасына, Гегард монастырына және Севан көліне де оңай жете алады. Осылайша, жаңа бағыт қала ішіндегі демалысты Арменияның тарихи және табиғи көрікті жерлеріне саяхатпен үйлестіруге мүмкіндік береді.
Ақтау – Ереван бағыты бойынша тікелей рейстердің қайта ашылуы Қазақстан мен Армения арасындағы туристік және іскерлік байланыстарды дамытуға, сондай-ақ қазақстандық жолаушылар үшін халықаралық бағыттардың қолжетімділігін арттыруға ықпал етеді.
