ADYM.KZ / Президент Қасым-Жомарт Тоқаев Қазақстанның 2026 жылдың қаңтар–маусым айларындағы әлеуметтік-экономикалық даму қорытындылары туралы есепті тыңдап, экономиканы одан әрі әртараптандыру жоспарын қарады. Бұл туралы Ақорданың баспасөз қызметі хабарлады.
Премьер-министр Олжас Бектеновтің мәліметінше, бірінші жартыжылдықта жалпы ішкі өнім 4,1 пайызға өсті. Өңдеу өнеркәсібі 9,8 пайызға, көлік саласы 7,1 пайызға, құрылыс 15,2 пайызға, сауда 5,7 пайызға, ауыл шаруашылығы 4,4 пайызға және байланыс қызметі 4,3 пайызға артқан. Негізгі капиталға тартылған инвестиция көлемі 9,5 триллион теңгеге жетсе, жеке инвестициялар 21,4 пайызға көбейген.
Үкімет басшысы биыл өңдеу секторында жалпы құны 1,7 триллион теңгені құрайтын 200 инвестициялық жобаны іске қосу жоспарланғанын айтты. Соның нәтижесінде 17 мың жаңа жұмыс орны ашылады. Сонымен қатар ірі автожол жобаларының жүзеге асырылуы, Астанадағы екінші әуежайдың құрылысы және Tarlan Astana көлік жүйесін дамытудың келесі кезеңі туралы баяндалды.
Тұрғын үй құрылысының көлемін биыл 20 миллион шаршы метрге жеткізу жоспарланып отыр. Ауыл шаруашылығы өнімінің көлемі 15 триллион теңгені құрап, егістік алқаптары 23,8 миллион гектарға дейін ұлғайған. Шаруаларды қолдауға 1 триллион теңге бөлініп, бюджеттен бөлінген әрбір теңге 6,5 теңге көлемінде жеке инвестиция тартуға мүмкіндік берген.
Президентке халықтың табысын арттыру жөніндегі кешенді жоспардың орындалуы мен инфляцияны төмендету шаралары туралы да ақпарат берілді. Маусым айының қорытындысы бойынша жылдық инфляция 10,3 пайыз болған.
Кездесуде әлеуметтік және көші-қон саясатын жетілдіру мәселелері қаралды. Жұмысқа орналасуды ынталандыру арқылы әлеуметтік қолдау тетіктерінің тиімділігін арттыру және кейбір әлеуметтік төлемдерді оңтайландыру нәтижесінде жылына 800 миллиард теңгеден астам қаржы үнемдеу көзделіп отыр.
Жылыту маусымына дайындық та негізгі назарда болды. Өткен маусым қорытындысында бес жылу электр орталығы жоғары тәуекелдің «қызыл» аймағынан шығарылып, үшеуі «жасыл» аймаққа ауыстырылған. Биыл 9 энергия блогы, 55 қазандық және 51 турбина жөнделеді. Бұл жұмыстарға 384 миллиард теңге бөлінген. Сондай-ақ «Энергетикалық және коммуналдық секторларды жаңғырту» ұлттық жобасы аясында жыл соңына дейін 12 мың шақырым инженерлік желіні жөндеу жоспарланған.
Үкімет басшысы цифрландыру және ұлттық жасанды интеллект инфрақұрылымын дамыту жұмыстары туралы да есеп берді. Оның айтуынша, әлемдік ІТ-компаниялардың қатысуымен қуаты 250 МВт болатын «Деректерді өңдеу орталығы алқабы» жобасы іске асырылады. Бұл бағытқа тартылған шетелдік инвестиция көлемі 10 миллиард доллардан асқан.
Президентке туризм саласын дамыту жөніндегі жоспарлар таныстырылды. Алматы тау кластерін дамыту және Almaty SuperSki жобасын жүзеге асыру туризмнің экономикадағы үлесін арттыруға бағытталған. Жоба аясында 60 шақырым тау шаңғысы трассасы салынғаннан кейін кешен тәулігіне 10 мың адамға дейін қабылдай алады. Нысанды 2028 жылдың желтоқсанында пайдалануға беру жоспарланып отыр. Сондай-ақ Қазақстанның «Болашақ ойындары-2026» халықаралық жарысын өткізуге дайындығы туралы ақпарат берілді.
Жиында жаңа Конституцияға сәйкес заңнаманы жетілдіру, «Әділетті Қазақстан», «Заң мен тәртіп» қағидаттарын нығайту, әлеуметтік саясатты дамыту, Алатау қаласының құқықтық негізін қалыптастыру және «Таза Қазақстан» бастамасын іске асыру бағытындағы жұмыстар да талқыланды.
Кездесу қорытындысында Қасым-Жомарт Тоқаев елдің тұрақты дамуына бағытталған жүйелі реформаларды жалғастыруды тапсырды. Президент Үкіметке әлеуметтік және инфрақұрылымдық нысандар салудың ауқымды бағдарламасын жедел іске қосуды міндеттеп, әсіресе заманауи денсаулық сақтау мекемелерінің құрылысын жеделдетуге ерекше назар аударуды тапсырды. Бұл бастама халықтың өмір сүру сапасын арттыруға бағытталған.
