ADYM.KZ / Мемлекет басшысы Қасым-Жомарт Тоқаев пен Грузия Премьер-министрі Ираклий Кобахидзенің келіссөздері қорытындысы бойынша Қазақстан Республикасы мен Грузия арасында стратегиялық серіктестік орнату жөніндегі бірлескен мәлімдеме қабылданды. Бұл туралы Ақорданың баспасөз қызметі хабарлады.
Ресми кездесу аясында екі елдің делегациялары бірқатар мемлекетаралық және ведомствоаралық құжаттармен алмасты.
Атап айтқанда:
- Қазақстан Республикасы Мәдениет және ақпарат министрлігі мен Грузия Мәдениет министрлігі арасында мәдениет саласындағы ынтымақтастық жөніндегі өзара түсіністік туралы меморандум;
- Қазақстан Республикасы Жасанды интеллект және цифрлық даму министрлігі мен Грузияның Экономика және орнықты даму министрлігі арасында цифрлық технологиялар мен жасанды интеллект саласындағы ынтымақтастық туралы меморандум;
- Қазақстан Республикасы Туризм және спорт министрлігі мен Грузияның Экономика және орнықты даму министрлігі арасында туризм саласындағы ынтымақтастық жөніндегі өзара түсіністік туралы меморандум.
Қабылданған құжаттар екіжақты қарым-қатынасты жаңа деңгейге көтеруге, сондай-ақ мәдениет, цифрландыру, инновация және туризм бағыттарындағы өзара байланысты нығайтуға мүмкіндік береді. Тараптар алдағы уақытта стратегиялық серіктестік аясындағы ынтымақтастықты одан әрі кеңейтуге ниетті екенін растады.
