ADYM.KZ / «Қазгидромет» РМК шілде айының климаттық ерекшеліктеріне қатысты көпжылдық бақылауларға негізделген шолу жариялады. Синоптиктердің мәліметінше, дәл осы айда еліміздің басым бөлігінде жылдағы ең жоғары ауа температурасы тіркеледі.
Мамандардың айтуынша, шілдеде күн ұзақтығы біртіндеп қысқара бастағанымен, ауа температурасы ең жоғары деңгейіне жетеді. Солтүстік және шығыс өңірлерде орташа айлық температура +18…+23 градус болса, Шығыс Қазақстанның таулы аудандарында +14…+16 градус шамасында болады. Ал оңтүстік өңірлерде ауа температурасы +28…+30 градусқа дейін көтеріледі.
Көпжылдық деректер бойынша, абсолюттік ең жоғары температура солтүстік және шығыс облыстарда +42…+43 градусқа, батыс, орталық және оңтүстік-шығыс өңірлерде +47…+48 градусқа дейін жетуі мүмкін. Ал еліміздің оңтүстігінде сынап бағаны +49…+50 градусқа дейін көтеріледі.
Мұндай аптап ыстық солтүстік пен шығыста орта есеппен он жылда екі рет байқалса, оңтүстік облыстарда он жылда 7-8 рет қайталанады. Ең оңтүстік аудандарда мұндай жоғары температура жыл сайын тіркелуі ықтимал.
Сонымен қатар синоптиктер шілдеде қысқа мерзімді салқындаулар болуы мүмкін екенін де атап өтті. Кей өңірлерде түнгі температура +0…+5 градусқа дейін төмендеуі ықтимал. Ал Солтүстік Қазақстан мен Шығыс Қазақстан облыстарының жекелеген аудандарында кей жылдары шілде айында -1…-4 градусқа дейін үсік тіркелген.
Жауын-шашынның ең көп мөлшері елдің солтүстік бөлігіне түседі. Бұл өңірлерде айлық норма 45-83 мм болса, шығыстағы таулы және тау бөктеріндегі аудандарда 86-182 мм-ге жетеді. Оңтүстік өңірлерде жауын-шашын көлемі айтарлықтай аз болып, айлық норма көбіне 1-12 мм аралығында сақталады.
Синоптиктердің айтуынша, шілдедегі жауын-шашын көбіне нөсер түрінде түседі. Кей жағдайларда бір тәуліктің ішінде бір айлық нормадан да көп жауын-шашын түсуі мүмкін.
Шілде айында найзағай жиі байқалады. Таулы өңірлерде айына 8-12 күн, солтүстік облыстарда 6-8 күн найзағай ойнауы ықтимал. Ал бұршақ көбіне оңтүстік-шығыстағы таулы аудандарда тіркеледі. Іле Алатауының солтүстік беткейінде жаз мезгілінде айына 1-3 ретке дейін бұршақ жаууы мүмкін.
Мамандардың болжамынша, шілде айында Қазақстан тұрғындарын аптап ыстықпен қатар нөсер жаңбыр, найзағай және кей өңірлерде бұршақ секілді құбылмалы ауа райы күтіп тұр.
