ADYM.KZ / Қазақстанның Сыртқы істер министрлігі Вьетнамға сапарлайтын азаматтарға жаңа онлайн тіркеу жүйесіне қатысты маңызды ақпарат жариялады.
Вьетнам Социалистік Республикасы шетел азаматтарының елге кіру рәсімдерін жеңілдету мақсатында «Алдын ала ақпарат ұсыну жүйесін» (Pre-arrival Information – PAI) пилоттық режимде іске қосты.
Вьетнам билігінің мәліметінше, жаңа жүйе шетелдік азаматтарға сапар алдында қажетті деректерді онлайн форматта алдын ала жіберуге мүмкіндік береді. Бұл шекаралық бақылаудан өту уақытын қысқартып, халықаралық әуежайлардағы жолаушылар ағынын тиімді ұйымдастыруға бағытталған.
Қазіргі уақытта PAI жүйесі Хошимин қаласындағы Таншоннят халықаралық әуежайында пилоттық режимде жұмыс істеп тұр. Алдағы уақытта оны Нойбай, Дананг, Камрань және Фукуок халықаралық әуежайларында, сондай-ақ өзге де шекаралық өткізу бекеттерінде кезең-кезеңімен енгізу жоспарланған.
Сыртқы істер министрлігі аталған жүйе Вьетнамға кіру үшін міндетті талап болып саналмайтынын және виза рәсімдеу қызметін атқармайтынын атап өтті.
Ведомствоның түсіндіруінше, PAI платформасы тек сапар туралы ақпаратты алдын ала ұсынуға арналған. Осыған байланысты Вьетнам билігі шетел азаматтарына тіркеуді тек ресми портал арқылы жүргізуге және жалған интернет-ресурстардан сақ болуға кеңес береді.
Министрлік Вьетнамға баруды жоспарлап отырған қазақстандықтарға сапар алдында жаңа жүйенің талаптарымен танысып шығуды ұсынды.
