Мемлекет басшысы Қасым-Жомарт Тоқаевтың төрағалығымен Қауіпсіздік Кеңесінің отырысы өтті, деп хабарлайды Adym.kz ақпараттық сайты Ақордаға сілтеме жасап.
Жиында Үкімет мүшелері еліміздің ғарыш саласының қазіргі жағдайы, жүзеге асырылып жатқан жобалар мен оны дамытудың алдағы бағыттары туралы баяндама жасады.
Отырыс барысында Президент ғарыш саласының стратегиялық маңызына тоқталып, спутниктік байланыс пен ғарыш инфрақұрылымының тұрақты жұмысын қамтамасыз етуге ерекше назар аударды.
Премьер-министрдің орынбасары – Жасанды интеллект және цифрлық даму министрі Жаслан Мәдиев спутниктік жүйелерді дамыту, ғарыш инфрақұрылымын жетілдіру және ғарыштық деректер негізінде қолданбалы шешімдерді енгізуге бағытталған негізгі жобалардың іске асырылу барысы туралы ақпарат берді.
Мемлекет басшысы бүгінде жаһандық ғарыш секторы түбегейлі өзгергенін атап өтті. Оның айтуынша, бұрын тек ірі державалардың қатысуымен дамыған салаға қазір жеке компаниялар да белсенді араласып, байланыс, хабар тарату, навигация, ғарыш мониторингі, ғылыми зерттеулер мен интернет қызметтерін дамытуда маңызды рөл атқарып отыр.
Сонымен қатар жиында ғарышты игеру ғылымын дамыту мәселелері қаралды. Президент ғылыми зерттеулерге, оның ішінде астрофизика саласына қолдау көрсетудің маңызын атап өтті. Ұлттық технологиялық және инженерлік әлеуетті нығайтуға бағытталған «Бәйтерек» жобасының жүзеге асырылу барысы оң бағаланды.
Қасым-Жомарт Тоқаев халықаралық ынтымақтастықты кеңейту қажеттігіне де тоқталып, Ресей Федерациясымен және өзге де шетелдік серіктестермен стратегиялық ықпалдастықты одан әрі дамыту маңызды екенін айтты. Сондай-ақ Байқоңыр қаласы мен оған жақын орналасқан елді мекен тұрғындарының әлеуметтік-тұрмыстық жағдайын жақсарту мәселесіне назар аударылды.
Отырыс қорытындысы бойынша Президент Үкіметке ғарыш саласын жаңғыртуға және оның әлеуетін мемлекет мүддесіне тиімді пайдалануға бағытталған бірқатар нақты тапсырма берді.
