АСТАНА — ADYM.KZ / Мемлекет басшысы Қасым-Жомарт Тоқаев асыл тұқымды Ақалтеке жылқыларын тамашалап, жуырда туған екі құлынға есім берді.
Президент Телерадиокешенінің мәліметінше, Мемлекет басшысы құлындаған екі биенің төлін көріп, жаңа туған құлындарға Ақниет және Бөрте деген ат қойған.
Сондай-ақ Президент қазақтың «Ер жетіліп, бас болар, тай жетіліп, ат болар» деген нақылын айтып, жас арғымақтарға жүйрік әрі тұлпар болуын тіледі.
Айта кетейік, бұған дейін Қасым-Жомарт Тоқаев ұлттық құндылықтарды дәріптеу мақсатында тазы мен төбетті ұлттық бренд ретінде кеңінен насихаттау жөнінде тапсырма берген болатын.
Ақалтеке тұқымы әлемдегі ең көне әрі сирек кездесетін жылқы тұқымдарының бірі саналады. Олар төзімділігімен, сымбаттылығымен және ерекше жүрісімен ерекшеленеді.
