ADYM.KZ / Биыл Қызылорда мен Ұлытау облыстарын жалғайтын «Қызылорда — Жезқазған» автожолының құрылысы толық аяқталып, пайдалануға беріледі. Бұл туралы Мәжілістің жалпы отырысында Премьер-министрдің бірінші орынбасары Нұрлыбек Нәлібаев мәлімдеді.
Мәжіліс депутаты Ерболат Сатыбалды Мәжіліс отырысында Премьер-министрдің бірінші орынбасары Нұрлыбек Нәлібаевтан Қызылорда — Жезқазған автожолының Жезқазған бағыты бойынша құрылыс жұмыстарының аяқталу мерзімі туралы сұрады.
Депутаттың айтуынша, жолдың Қызылорда бағытындағы бөлігі өткен жылы пайдалануға берілгенімен, Жезқазған бағытындағы жұмыстар әлі жалғасып жатыр. Сондықтан тұрғындар нысанның толық аяқталуын күтіп отыр.
Нұрлыбек Нәлібаевтың мәліметінше, өткен жылдың соңында аталған автожолдың 216 шақырымдық учаскесі пайдалануға берілген.
– Биыл Ұлытау мен Қызылорда облыстарын байланыстыратын жолды толық аяқтап, халық игілігіне ұсынамыз. Сонымен қатар ұзындығы 575 шақырым болатын «Қарағанды – Жезқазған» автожолы еліміз үшін аса маңызды жобалардың бірі саналады. Оның құны 524 млрд теңгені құрайды. Құрылыс жұмыстарын осы айдың соңына дейін бастап, алдағы екі жыл ішінде аяқтауды жоспарлап отырмыз, — деді Үкімет басшысының бірінші орынбасары.
Жалпы, биыл республика бойынша 11 мың шақырымнан астам автожол күрделі және орташа жөндеуден өткізіліп, қайта жаңартылады. Жұмыстар облыстық және аудандық маңызы бар жолдарды, көпірлер салу мен жол инфрақұрылымын абаттандыру шараларын да қамтиды.
Ірі жобалардың қатарында ұзындығы 765 шақырым болатын «Бейнеу-Сексеуіл» автожолы бар. Жобаның жалпы құны 725 млрд теңгені құрайды.
Сондай-ақ «Батыс Еуропа-Батыс Қытай» халықаралық көлік дәлізін жаңғырту аясында «Ақтөбе-Қызылорда» учаскесін екінші санаттан бірінші санатқа ауыстыру жоспарланған. Бұл бағыттағы жұмыстар да биыл басталады.
Бұдан бөлек, Жаңаөзеннен Түрікменстан шекарасына дейінгі жолды жаңғырту және басқа да маңызды жол инфрақұрылымы нысандарын аяқтау көзделіп отыр.
