Жетісай ауданында бақша өнімдерін жинау науқаны қызу жүріп жатыр. Алғашқы өнім отандық ірі қалалар мен көршілес Ресей Федерациясының сауда нарығына жол тартты, деп хабарлайды Adym.kz тілшісі.Қазіргі таңда аймақтағы егістік алқаптарынан бір аптаның ішінде 200 тоннадан астам қарбыз жиналып, тұтынушыларға жеткізілді. Биыл ерте піскен өнімге сұраныс жоғары. Бұл шаруалардың табысын арттырып қана қоймай, ауданның ауыл шаруашылығы әлеуетін дәлелдеп отыр.
Биыл жетісайлық диқандар 80 мың гектарға жуық суармалы алқапты толық игерген. Нақтырақ айтқанда:
-
- 44 мың гектарға — мақта шиті;
- 17,1 мың гектарға — бақша дақылдары;
- 7,5 мың гектарға — дәндік жүгері;
- 6,4 мың гектарға — жоңышқа;
- 3,7 мың гектарға — көкөніс егілді.
Өткен жылы 16,9 мың гектар бақшалық жердің 3 мың гектарын қарбыз құраса, биыл бұл көрсеткіш өзгеріссіз қалған. Яғни, жалпы 17,1 мың гектар бақша алқабының 3 мың гектарына қарбыз егілді.
Қарбыз егу көлемі ұлғаймаса да, диқандар заманауи агротехнологияларды тиімді пайдалану мен ағын судың уақытылы берілуінің арқасында өнімділікті еселеген. Шаруалар алдағы күндері жиын-терін қарқынын күшейтіп, экспорт көлемін арттыруды көздеп отыр. Бақша өнімдерін экспорттау өңір экономикасына серпін беріп, жергілікті тұрғындарды тұрақты жұмыспен қамтуға септігін тигізуде.
