ADYM.KZ / Шымкент қаласы бойынша Экономикалық тергеп-тексеру департаментінің бастамасымен қаладағы 34 колледждің студенттеріне электронды тұтыну жүйелерінің, соның ішінде вейптердің зияны мен олардың заңсыз айналымына қарсы күрес мәселелері бойынша семинар-сабақтар өткізілді.
Іс-шаралардың негізгі мақсаты – жастардың зиянды әдеттерге қатысты сауаттылығын арттыру, вейп қолданудың денсаулыққа тигізетін кері әсерін түсіндіру және қолданыстағы заңнама талаптары туралы ақпарат беру. Сонымен қатар студенттердің құқықтық мәдениетін қалыптастырып, салауатты өмір салтын ұстануға ынталандыруға басымдық берілді.
Семинар барысында мамандар вейптерді әкелу, өндіру, сату және тарату үшін Қазақстан Республикасының заңнамасында қылмыстық жауапкершілік көзделгенін түсіндірді. Тиісті заңнамалық нормалар 2024 жылғы 20 маусымнан бастап күшіне енгені айтылды. Осыған байланысты жастарға электронды тұтыну жүйелерінің заңсыз айналымына қатысудың құқықтық салдары жөнінде түсінік берілді.
Кездесу барысында вейптердің адам денсаулығына зиянына да ерекше назар аударылды. Мамандар никотиннің тәуелділік тудыратын қасиетін, оның ағзаға кері әсерін және электронды темекіні қолданудың ықтимал қауіптерін атап өтті. Әсіресе жасөспірімдер мен жастардың ағзасы қалыптасу кезеңінде болғандықтан, зиянды әдеттерден аулақ болудың маңызы түсіндірілді.
Сонымен қатар студенттерге әлеуметтік желілер мен интернет кеңістігінде вейптерді тартымды етіп көрсететін жарнамаларға сын көзбен қарау қажеттігі айтылды. Өнімнің сәнді көрінуі немесе айналасындағылардың оны қолдануы оның қауіпсіз екенін білдірмейді. Сондықтан әр адамның өз денсаулығына жауапкершілікпен қарап, саналы таңдау жасауы маңызды.
Профилактикалық семинарлар жастар арасында құқық бұзушылықтардың алдын алуға, заң талаптарын түсіндіруге және денсаулыққа жауапкершілікпен қарау мәдениетін қалыптастыруға бағытталған. Мұндай кездесулер студенттерге зиянды әдеттердің салдарын түсініп, өз болашағына қатысты дұрыс шешім қабылдауға мүмкіндік береді.
Жастарға үндеу:
«Вейп – сән емес, денсаулыққа төнген қауіп. Бір рет байқап көру никотинге тәуелділіктің бастамасына айналуы мүмкін. Денсаулығыңды, болашағыңды және еркіндігіңді таңда!»
Жастар арасында салауатты өмір салтын насихаттау және вейптердің заңсыз айналымының алдын алу бағытындағы түсіндіру жұмыстарының маңызы зор. Өйткені денсаулықты сақтау – әр адамның жеке жауапкершілігі, ал қауіпсіз әрі саналы таңдау жасау жарқын болашақтың негізі.
