ADYM.KZ / Шымкент қаласы жастар саясаты басқармасының «Жастар ресурстық орталығы» КММ-нің ұйымдастыруымен «Оңтүстік Қазақстан медицина академиясы» АҚ университетінде «Психикалық денсаулық – өмір сапасының негізі» тақырыбында жастармен кездесу өтті. Іс-шараның мақсаты – жастардың психологиялық және құқықтық сауаттылығын арттыру, денсаулыққа жауапкершілікпен қарауға үйрету және қауіпсіз мінез-құлық дағдыларын қалыптастыру.
Кездесу барысында зорлық-зомбылықтың алдын алу, ерте жүктіліктің ықтимал кері әсерлері, оның алдын алу жолдары және қиын жағдайларда тиісті мамандарға жүгінудің маңызы талқыланды. Қатысушыларға өз құқықтарын білу, жеке қауіпсіздігін сақтау және денсаулығына қатысты мәселелерді назардан тыс қалдырмау қажеттігі түсіндірілді.
Іс-шараға «Жастар ресурстық орталығы» КММ Психологиялық көмек көрсету бөлімінің психолог маманы Әлімқұл Ақсымбат, «Камея» клиникасының акушер-гинекологы Умиралиева Ұлбала Қасымқызы, Әл-Фараби ауданы прокуратурасының прокуроры Асқар Тұрдымұратұлы Алимбеков, Шымкент қаласы Полиция департаменті Абай аудандық полиция басқармасы ОТЗЗҚКБ инспекторы, полиция лейтенанты Ахмет Сымбат Батырбекқызы және Шымкент қаласы Полиция департаменті Киберқылмысқа қарсы іс-қимыл басқармасының жедел уәкілі, полиция капитаны Бахытжан Тұрсынбаевич Бекбаев қатысты.
Мамандар жастарға психикалық денсаулықты сақтаудың маңызын түсіндіріп, эмоционалдық қиындықтарды елемей жүре бермей, қажет болған жағдайда психологтың көмегіне жүгінуге кеңес берді. Сондай-ақ зорлық-зомбылықтың кез келген түріне бейжай қарамау, қауіп төнген жағдайда сенімді ересектерге немесе тиісті органдарға хабарлау қажеттігі айтылды.
Акушер-гинеколог репродуктивті денсаулықты қорғау, жүктіліктің алдын алу және денсаулыққа қатысты сұрақтар бойынша медициналық маманнан уақтылы кеңес алудың маңызын атап өтті. Ал құқық қорғау және прокуратура өкілдері жастарға өз құқықтарын білу, заң талаптарын сақтау және қауіпсіздікке қатер төндіретін жағдайларда дұрыс әрекет ету жөнінде ақпарат берді.
Кездесу барысында қатысушылар өздерін толғандырған сұрақтарын қойып, мамандардан жауап алды. Мұндай кездесулер жастардың психологиялық, медициналық және құқықтық сауаттылығын арттыруға, өз денсаулығы мен қауіпсіздігіне саналы түрде қарауына ықпал етеді.
