ADYM.KZ / Шымкент қаласында жастардың денсаулығын қорғау, зиянды әдеттердің алдын алу және салауатты өмір салтын насихаттау мақсатында ақпараттық-түсіндіру кездесуі өтті. Шымкент қаласы Жастар саясаты басқармасының «Жастар ресурстық орталығы» КММ ұйымдастырған іс-шара Оңтүстік Қазақстан медицина академиясының студенттеріне арналды.
Кездесуге Шымкент қаласының денсаулық сақтау басқармасына қарасты «ЖИТС-тің алдын алу және оған қарсы күрес жөніндегі орталығы» алдын алу бөлімінің маманы Аяжан Джарасбай, ШЖҚ «Психикалық денсаулық сақтау орталығының» дәрігер-наркологы Раушан Асанқызы Баймұрунова және Жастар ресурстық орталығының Аутрич және NEET жастармен жұмыс бөлімінің маманы Аман Мұқтархан қатысты.
Іс-шара барысында мамандар есірткі заттарын қолданудың адам ағзасына тигізетін зияны, нашақорлыққа тәуелділіктің алдын алу жолдары және оның жеке адам мен қоғамға әсері туралы кеңінен түсіндірді. Сондай-ақ жастардың зиянды әдеттерден аулақ болып, денсаулығына қауіп төндіретін жағдайларда дұрыс шешім қабылдауының маңыздылығына тоқталды.
Кездесудің маңызды тақырыптарының бірі – АИТВ инфекциясының таралу жолдары мен одан қорғану шаралары. Мамандар инфекцияның алдын алу, медициналық сауаттылықты арттыру және денсаулыққа жауапкершілікпен қарау мәселелері жөнінде ақпарат берді. Сонымен қатар АИТВ туралы дұрыс түсінік қалыптастырудың, жалған ақпаратқа сенбеудің және қажетті жағдайда медициналық көмекке жүгінудің маңызы атап өтілді.
Мұндай кездесулер жастардың денсаулыққа қатысты білімін толықтырып, өз өмірі мен болашағына жауапкершілікпен қарауына ықпал етеді. Әсіресе студенттер арасында профилактикалық түсіндіру жұмыстарын жүргізу зиянды әдеттердің алдын алуға, салауатты өмір салтын ұстануға және медициналық сауаттылықты арттыруға мүмкіндік береді.
Айта кетейік, жастармен жүйелі түрде жұмыс жүргізу олардың қауіпсіздігі мен әл-ауқатын нығайтудың маңызды бағыттарының бірі саналады. Осы ретте ақпараттық-түсіндіру кездесулері жастар арасында денсаулық мәдениетін қалыптастыруға бағытталған жұмыстардың жалғасы болып табылады.
