ADYM.KZ / Бүгін Астанада Мемлекет басшысы Қасым-Жомарт Тоқаевтың қатысуымен бірінші шақырылымдағы Қазақстан Республикасы Құрылтайының бірінші сессиясы өз жұмысын бастады.
Жаңа Құрылтайдың құрамы 2026 жылғы 23 тамызда өткен сайлау қорытындысы бойынша жасақталды. Орталық сайлау комиссиясы бюллетеньдерді санау нәтижесінде саяси партиялардың алған дауысын жариялаған болатын.
Сайлау қорытындысына сәйкес, «Әділет» партиясы 6 528 948 дауыс немесе 71,17 пайыз жинады. Жалпыұлттық социал-демократиялық партияны 469 058 сайлаушы немесе 5,11 пайыз қолдады.
Сондай-ақ «Ауыл» партиясы 574 621 дауысқа немесе 6,26 пайызға, «Ақ жол» Қазақстанның демократиялық партиясы 478 083 дауысқа немесе 5,21 пайызға, ал Respublica партиясы 509 631 дауысқа немесе 5,56 пайызға ие болды.
Сайлау заңнамасына сәйкес сайлаушылардың бес және одан да көп пайыз даусын жинаған бес саяси партия Құрылтай құрамына өтті. Нәтижесінде 145 депутаттық мандат төмендегідей бөлінді:
- «Әділет» партиясы — 110 мандат;
- Жалпыұлттық социал-демократиялық партия — 8 мандат;
- «Ауыл» партиясы — 10 мандат;
- «Ақ жол» Қазақстанның демократиялық партиясы — 8 мандат;
- Respublica партиясы — 9 мандат.
Осылайша, Қазақстанның бір палаталы жаңа Парламенті — Құрылтайдың депутаттық корпусы толық жасақталып, бүгін оның бірінші сессиясы ресми түрде ашылды.
Бұған дейін барлық бес саяси партия өздеріне тиесілі депутаттық мандаттарды иеленген кандидаттардың тізімін жариялаған болатын. Ал 27 тамызда Орталық сайлау комиссиясы Құрылтайдың сайланған 145 депутатын ресми түрде тіркеп, оларға депутаттық куәліктері мен төсбелгілерін табыстады.
Құрылтайдың бірінші сессиясында жаңа депутаттық корпустың алдағы жұмыс тәртібі айқындалып, заң шығарушы органның қызметін ұйымдастыруға қатысты маңызды мәселелер қаралады.
