ADYM.KZ / Алматыда қағаз қалдықтарын қайта өңдейтін екі кәсіпорынды жаңғырту жобасы жүзеге асырылып жатыр. Жобалар толық іске қосылғаннан кейін кәсіпорындардың жиынтық өндірістік қуаты жылына 200 мың тоннадан асады.
Бұл туралы Қазақстан Республикасы Экология және табиғи ресурстар министрлігі хабарлады.
Ведомствоның мәліметінше, «Жасыл даму» АҚ қалдықтарды қайта өңдеу көлемін ұлғайтуға және қолданыстағы кәсіпорындардың өндірістік қуатын арттыруға бағытталған жобаларды қаржыландыруды жалғастырып келеді.
Солардың бірі – «KZ Recycling» ЖШС кәсіпорнын жаңғырту жобасы. Жоба аяқталғаннан кейін кәсіпорынның қағаз қалдықтарын қайта өңдеу қуаты жылына 150 мың тоннаға дейін жеткізіледі.
Жобаның жалпы құны шамамен 36,5 млрд теңгені құрайды. Қаржыландыру «Жасыл даму» АҚ тарапынан кәдеге жарату төлемдері есебінен «Өнеркәсіпті дамыту қоры» АҚ-мен бірлесіп жүзеге асырылған.
Экология және табиғи ресурстар министрлігінің мәліметінше, бөлінген қаражат толық көлемде игерілген. Қазіргі уақытта кәсіпорында құрылыс-монтаж жұмыстары жүргізіліп, өндірісті іске қосуға қажетті инфрақұрылым дайындалуда.
Жобаны толық аяқтау 2028 жылға жоспарланған.
Жалпы, Алматы қаласында қағаз қалдықтарын қайта өңдеу бағытында екі жоба жүзеге асырылып жатыр. Кәсіпорындарды жаңғырту жұмыстары аяқталғаннан кейін олардың жалпы өндірістік қуаты жылына 200 мың тоннадан асады.
Жобалардың іске асуы қалдықтарды басқару жүйесін жетілдіруге, қайта өңдеу инфрақұрылымын дамытуға және макулатураны екінші реттік шикізат ретінде қайта айналымға енгізу көлемін арттыруға мүмкіндік береді.
Мұндай өндірістердің дамуы қоршаған ортаға түсетін жүктемені азайтып, полигондарға жіберілетін қағаз қалдықтарының көлемін қысқартуға да ықпал етеді. Сонымен қатар қайта өңдеу саласындағы жаңа өндірістік қуаттар айналым экономикасының дамуына және ресурстарды тиімді пайдалануға жағдай жасайды.
Экология және табиғи ресурстар министрлігі қалдықтарды қайта өңдеу саласындағы жобаларды қолдау жұмыстарын алдағы уақытта да жалғастырады.
