ADYM.KZ / Конституциялық сот Мемлекет басшысының өтініші бойынша 2026 жылғы Конституцияда көзделген бірқатар жоғары мемлекеттік лауазымдарға сайлану және тағайындалу тәртібіне қатысты ресми түсіндірме жариялады.
Президенттің өтінішінде 1995 жылғы Конституцияға сәйкес қызметін атқарып келе жатқан Президенттің, Конституциялық сот төрағасының, Жоғарғы сот төрағасының және Бас прокурордың 2026 жылғы Конституция күшіне енгеннен кейін аталған қызметтерге қайта сайлануы немесе тағайындалуы мүмкін бе деген мәселе көтерілген.
Конституциялық соттың түсіндіруінше, жаңа Конституцияда белгіленген шектеулер тек 2026 жылғы Конституция мен соған сәйкес қабылданған нормативтік құқықтық актілер аясында жүзеге асқан сайлау немесе тағайындау фактілеріне қатысты қолданылады.
Соттың мәліметінше, Конституцияның 43-бабының 1-тармағында, 72-бабының 2 және 3-тармақтарында, 83-бабының 1-тармағында және 84-бабының 3-тармағында 1995 жылғы Конституция кезеңіндегі қызмет мерзімдерін немесе сол кездегі сайлану мен тағайындалу фактілерін есепке алу туралы талап көзделмеген.
Осыған байланысты Конституциялық сот 1995 жылғы Конституцияға сәйкес аталған лауазымдарды атқарған тұлғалардың 2026 жылғы Конституция 2026 жылғы 1 шілдеден бастап күшіне енгеннен кейін сол қызметтерге қайта сайлануына немесе тағайындалуына конституциялық-құқықтық кедергі жоқ деген қорытындыға келді.
Сонымен қатар сот мұндай жағдайда жаңа Конституция күшіне енгеннен кейінгі сайлану немесе тағайындалу аталған конституциялық нормаларда белгіленген шектеулерді қолдану тұрғысынан алғашқы сайлану немесе алғашқы тағайындалу ретінде есептелетінін атап өтті.
