ADYM.KZ / Шымкент қаласы Жастар саясаты басқармасының «Жастар ресурстық орталығы» КММ ұйымдастыруымен Инновациялық технологиялық колледжінде «Лудомания – тәуелділікке апарар қауіпті жол» тақырыбында кездесу өтті. Іс-шараның мақсаты – жастар арасында құмар ойындарға тәуелділіктің алдын алу, оның зардаптары туралы түсінік қалыптастыру және интернет кеңістігіндегі қауіп-қатерлерден сақтану жолдарын түсіндіру.
Кездесуге «Жастар ресурстық орталығы» КММ Психологиялық көмек көрсету бөлімінің маманы Жібек Мұратқызы Сайдахан және Шымкент қаласы Полиция департаменті Киберқылмысқа қарсы іс-қимыл басқармасының жедел уәкілі, полиция капитаны Мақсат Жанысбаев қатысты.
Кездесу барысында мамандар лудоманияның адам өміріне тигізетін кері әсерлері туралы айтып, құмар ойындарға тәуелділіктің психологиялық және әлеуметтік салдарын түсіндірді. Олардың айтуынша, ойынға шамадан тыс әуестік адамның қаржылық жағдайына ғана емес, эмоционалдық күйіне, отбасымен және айналасындағы адамдармен қарым-қатынасына да кері әсер етуі мүмкін. Сондықтан тәуелділіктің алғашқы белгілерін дер кезінде байқап, оның алдын алу маңызды.
Сонымен қатар жастарға интернет кеңістігінде кездесетін қауіп-қатерлер, онлайн алаяқтықтың кең таралған тәсілдері және күмәнді ұсыныстардың белгілері жөнінде ақпарат берілді. Полиция өкілі цифрлық ортада жеке деректерді қорғаудың, белгісіз сілтемелерге өтпеудің және сенімсіз платформаларға қаржылық мәліметтерді енгізбеудің маңызын атап өтті.
Мамандар жастарды оңай табысқа уәде беретін жарнамаларға сын көзбен қарауға, қаржылық шешімдерді асықпай қабылдауға және өз әрекеттеріне жауапкершілікпен қарауға шақырды. Сондай-ақ құмар ойындар арқылы қысқа уақытта пайда табуға ұмтылу орны толмас қаржылық шығындарға әкелуі мүмкін екенін ескертті.
Кездесу барысында психологиялық саулықты сақтау, бос уақытты тиімді ұйымдастыру және қиындықтар туындаған жағдайда мамандардан көмек сұраудың маңызына да назар аударылды. Құмар ойындарға қызығушылық бақылаудан шығып, күнделікті өмірге кедергі келтіре бастаған жағдайда, мәселені жасырмай, жақын адамдармен немесе психологпен кеңесу маңызды.
Мұндай кездесулер жастардың құқықтық және қаржылық сауаттылығын арттырып, интернеттегі қауіпсіздік мәдениетін қалыптастыруға ықпал етеді. Сонымен қатар жас буынның саналы таңдау жасауына, зиянды әдеттерден аулақ болуына және өз болашағына жауапкершілікпен қарауына бағыт береді.
Жастар арасында лудоманияның алдын алу және қауіпсіз мінез-құлық дағдыларын қалыптастыру бағытындағы түсіндіру жұмыстарының маңызы зор. Өйткені тәуелділіктің алдын алу – жеке адамның ғана емес, тұтас қоғамның саулығы мен әл-ауқатына қатысты ортақ міндет.
