ADYM.KZ / Шымкент қаласы Жастар ресурстық орталығында жас суретші Ануланың «Жерұйық» атты жеке көрмесінің ашылуына арналған шығармашылық кеш өтті. Мәдени іс-шара өнерге қызығушылық танытқан жастардың басын қосып, бейнелеу өнерін дәріптеуге және жас таланттардың шығармашылығын қолдауға бағытталды.
Көрменің «Жерұйық» деп аталуы да ерекше мағынаға ие. Қазақ дүниетанымында Жерұйық – бейбітшілік пен берекенің, бақытты өмір мен ізгі армандардың символы. Бұл ұғым өнер иесінің қиялы мен ішкі әлемін бейнелейтін шығармашылық идеялармен үндеседі. Суретшінің туындылары көрерменді сұлулықты бағалауға, қоршаған ортаға өзгеше көзқараспен қарауға және рухани құндылықтар туралы ойлануға жетелейді.
Шығармашылық кештің көркін фольклорлық ансамбльдің орындауындағы ұлттық күйлер аша түсті. Домбыраның күмбірлеген үні ұлттық өнердің бай мұрасын танытып, кештің мазмұнына ерекше әсер қосты. Сондай-ақ әнші Жазира Әбдібекқызы әсем әндерін орындап, қонақтарға көтеріңкі көңіл күй сыйлады. Бейнелеу өнері мен музыканың үйлесімі кештің көркемдік мазмұнын байыта түсті.
Кездесу барысында көрме авторы Анулa өзінің шығармашылық жолы туралы әңгімелеп, туындыларының идеялары мен оларды дүниеге әкелудегі ізденістерімен бөлісті. Жас суретші үшін бұл кеш өз еңбектерін көпшілікке таныстырып қана қоймай, көрермендермен пікір алмасуға, шығармашылық ойларын жеткізуге мүмкіндік берді.
Мұндай мәдени кездесулер жас буынның өнерге деген қызығушылығын арттырып, олардың шығармашылық әлеуетін дамытуға ықпал етеді. Сонымен қатар, жастардың өзіндік көзқарасын қалыптастыруға, ұлттық мәдениет пен рухани құндылықтарды тереңірек тануына жол ашады.
Іс-шара соңында ұстаздар мен қонақтар жас суретшіге жылы лебіздерін білдіріп, шығармашылық табыс тіледі. Олар оның өнер жолындағы ізденістеріне сәттілік тілеп, алдағы уақытта да жаңа туындылармен қуанта беруіне сенім білдірді.
«Жерұйық» көрмесі жас суретшінің шығармашылық әлемін танытып, өнердің адам жүрегіне жол табатын ерекше күшін көрсетті. Осындай бастамалар талантты жастарды қолдауға, мәдени өмірді жандандыруға және өнерге деген құрметті арттыруға үлес қосады.
