ADYM.KZ / Алматыда сәбиін көтеріп, курьер болып жұмыс істеген әйел Шымкент қаласына көшіп кеткен. Бұл туралы Еңбек және халықты әлеуметтік қорғау бірінші вице-министрі Ербол Тұяқбаев мәлімдеді.
Оның айтуынша, оқиға көпшілікке тарағаннан кейін Алматы қаласының жұмыспен қамту және әлеуметтік бағдарламалар басқармасының мамандары отбасымен байланысқа шығып, мемлекеттік қолдау шараларын және жұмысқа орналасу мүмкіндіктерін ұсынған. Алайда отбасы бұл ұсыныстан бас тартқан.
«Олар Алматыдан кетіп қалды. Бұрын Шымкентте тұрған екен, сол жаққа қайта оралды. Ешқандай қысым болған жоқ, бұл – өз шешімдері. Неге олай жасағанын білмеймін, мүмкін туыстарының шақыруы болған шығар», – деді вице-министр.
Кейін Шымкент қаласының жұмыспен қамту және әлеуметтік қорғау басқармасы отбасының қалаға қоныс аударғанын растады.
Ербол Тұяқбаевтың айтуынша, министрлік тарапынан әйелдің жұмыс істеуіне шектеу жоқ. Дегенмен, жауапты органдар ана мен баланың қауіпсіздігіне ерекше назар аударатынын атап өтті.
Айта кетейік, бұған дейін министрлік еңбек кітапшаларын цифрлық форматқа көшіру және азаматтардың еңбек өтілін электронды жүйеде тіркеу жоспарланып отырғанын хабарлаған болатын.
